‘ವೆಲ್ವೆಟ್’ ಕ್ರಾಂತಿ

10 Sep, 2017
ಸಿ.ಜಿ. ಮಂಜುಳಾ

ಹಿರಿಯ ಪತ್ರಕರ್ತೆ ಗೌರಿ ಲಂಕೇಶ್ ಹತ್ಯೆ, ಪ್ರತಿರೋಧದ ಧ್ವನಿಗಳನ್ನು ಹತ್ತಿಕ್ಕುವ ವ್ಯವಸ್ಥಿತ  ಸಂಸ್ಕೃತಿಗೆ ಸಂಕೇತ. ಪತ್ರಿಕಾ ಸ್ವಾತಂತ್ರ್ಯ , ಅಭಿವ್ಯಕ್ತಿ ಸ್ವಾತಂತ್ರ್ಯ  ಜಾಗತಿಕವಾಗಿ ಅಪಾಯಕ್ಕೆ ಸಿಲುಕಿರುವ ದಿನಗಳಿವು.  ದಿನನಿತ್ಯದ  ಕರ್ತವ್ಯಗಳ ನಿರ್ವಹಣೆ ಸಂದರ್ಭದಲ್ಲೂ ಬೆದರಿಕೆ ಹಾಗೂ ಆಕ್ರಮಣಗಳಿಗೆ ಕಾರ್ಯನಿರತ  ಪತ್ರಕರ್ತರು ಗುರಿಯಾಗುತ್ತಿರುವ ವಿದ್ಯಮಾನವನ್ನು ಗೌರಿ ಲಂಕೇಶ್ ಹತ್ಯೆ ಪ್ರಕರಣ  ನಮಗೆ ನೆನಪಿಸಿದೆ.

ಇತ್ತೀಚೆಗಷ್ಟೇ ಬೆಂಗಳೂರಿನಲ್ಲಿ ‘ವೆಲ್ವೆಟ್ ರೆವಲ್ಯೂಷನ್’  ಸಾಕ್ಷ್ಯಚಿತ್ರ  ಪ್ರದರ್ಶನಗೊಂಡಿತ್ತು.  ಜಗತ್ತಿನ ವಿವಿಧ ಭಾಗಗಳಲ್ಲಿ ಪತ್ರಕರ್ತೆಯರು ಎದುರಿಸುತ್ತಿರುವ ತೀವ್ರತರ ಅಪಾಯಗಳ ಕಥಾನಕಗಳನ್ನು ಈ ಚಿತ್ರ ನಿರೂಪಿಸಿದೆ.  ವೃತ್ತಿಬದುಕಿನಲ್ಲಿ ಅನೇಕ ವೈಯಕ್ತಿಕ ನಷ್ಟಗಳನ್ನು ಅನುಭವಿಸಿದ ಅನೇಕ ಪತ್ರಕರ್ತೆಯರ ಕಥಾನಕಗಳಿರುವ  ಈ ಚಿತ್ರದ ಗುಂಗಿನಿಂದ ಇನ್ನೂ ಹೊರಬರದೆ ಇರುವ ಸಂದರ್ಭದಲ್ಲಿ ನಮ್ಮ ಮನೆ ಬಾಗಿಲಲ್ಲೇ ಗೌರಿ ಲಂಕೇಶ್ ಹತ್ಯೆಯಾಗಿದ್ದು  ಬೆಚ್ಚಿಬೀಳಿಸುವಂತಹದ್ದು.  ಭಾರತದಂತಹ ಪ್ರಜಾಪ್ರಭುತ್ವ ರಾಷ್ಟ್ರವೂ  ಪತ್ರಕರ್ತರಿಗೆ ಅಪಾಯಕಾರಿ ಸ್ಥಳವಾಗಿ ಪರಿಣಮಿಸುತ್ತಿದೆಯೆ ಎಂಬಂಥ  ಪ್ರಶ್ನೆಯನ್ನು  ಇದು ಹುಟ್ಟುಹಾಕಿದೆ.

ವಿಶ್ವದಾದ್ಯಂತ ಪತ್ರಕರ್ತರ  ಮೇಲೆ ನಡೆಯುತ್ತಿರುವ ಇಂತಹ ಆಕ್ರಮಣಗಳ ಹಿನ್ನೆಲೆಯಲ್ಲಿ ‘ವೆಲ್ವೆಟ್ ರೆವಲ್ಯೂಷನ್’ ಚಿತ್ರ ಪ್ರಸ್ತುತವಾಗುತ್ತದೆ.  ಕಳೆದ ಮಾರ್ಚ್ ತಿಂಗಳಿನಲ್ಲಿ ದೆಹಲಿಯಲ್ಲಿ ಏಷ್ಯನ್ ವಿಮೆನ್ ಫೆಸ್ಟಿವಲ್ ನಲ್ಲಿ ಮೊದಲ ಬಾರಿಗೆ  ಪ್ರದರ್ಶನಗೊಂಡ ಈ ಚಿತ್ರ  ವಿವಿಧ ರಾಷ್ಟ್ರಗಳಲ್ಲಿ ಪ್ರದರ್ಶಿತಗೊಳ್ಳುತ್ತಿದ್ದು ಪ್ರಶಸ್ತಿಗಳನ್ನೂ ಗೆದ್ದುಕೊಂಡಿದೆ.  ಬೆಂಗಳೂರು ಮೂಲದ  ನೂಪುರ್ ಬಸು ಈ ಸಾಕ್ಷ್ಯ ಚಿತ್ರದ ಕಾರ್ಯನಿರ್ವಾಹಕಿ ನಿರ್ಮಾಪಕಿ .  ಮೂರೂವರೆ ದಶಕಗಳ ಕಾಲ ಮುಖ್ಯವಾಹಿನಿಯ ಮುದ್ರಣ ಹಾಗೂ ದೃಶ್ಯ ಮಾಧ್ಯಮಗಳಲ್ಲಿ  ಕೆಲಸಮಾಡಿದವರು ಅವರು.

ವ್ಯವಸ್ಥೆ ಅಥವಾ ಅಧಿಕಾರ ಕೇಂದ್ರಗಳ ಕುರಿತಾಗಿ ಸತ್ಯವನ್ನು ನುಡಿದಿದ್ದಕ್ಕಾಗಿ ಭಾರಿ ಬೆಲೆ ತೆರಬೇಕಾದ ವಿವಿಧ ದೇಶಗಳ ವಿವಿಧ ಪತ್ರಕರ್ತೆಯರ  ಬದುಕುಗಳನ್ನು ಈ  57 ನಿಮಿಷಗಳ ಅಂತರರಾಷ್ಟ್ರೀಯ ಸಾಕ್ಷ್ಯಚಿತ್ರ ಚಿತ್ರಿಸುತ್ತದೆ.  ಪತ್ರಿಕಾ ಸ್ವಾತಂತ್ರ್ಯ ವನ್ನು ಹತ್ತಿಕ್ಕುವ ಯತ್ನಗಳ ನಡುವೆಯೇ ಈ ಪತ್ರಕರ್ತೆಯರ ದಿಟ್ಟತನದ ಚಿತ್ರಣ ಇಲ್ಲಿದೆ.  ಸುದ್ದಿ ಬೇಟೆಯಲ್ಲಿ ತೊಡಗಿರುವ ಮಹಿಳೆಯರ ಬದುಕು ಹಾಗೂ ಅವರ ದೃಷ್ಟಿಕೋನಗಳನ್ನು ಇದು ದಾಖಲಿಸುತ್ತದೆ.

ಸ್ಕ್ರಾಲ್‍ ಅಂತರ್ಜಾಲ ಪತ್ರಿಕೆ ವರದಿಗಾರ್ತಿ ಮಾಲಿನಿ ಸುಬ್ರಮಣಿಯಮ್ ಅವರು   ತಮ್ಮ   ಸ್ವಂತ ಊರು ಬಸರ್‌ನಿಂದ ಹೊರ ಹೋಗುವ ಒತ್ತಡ ಸೃಷ್ಟಿಯಾಗುತ್ತದೆ. ಛತ್ತೀಸಗಡದಲ್ಲಿ ಆದಿವಾಸಿಗಳ ವಿರುದ್ಧ ಸಶಸ್ತ್ರ ಪಡೆಗಳು ನಡೆಸಿದ ಮಾನವ ಹಕ್ಕುಗಳ ಉಲ್ಲಂಘನೆ ಬಗ್ಗೆ  ಅವರು ವರದಿ ಮಾಡಿದ್ದು ಇದಕ್ಕೆ ಕಾರಣ. ಸಿರಿಯಾದ ಪತ್ರಕರ್ತೆ ಝೈನಾ  ಎರ್ಹಾಯಮ್  ತನ್ನ  8 ತಿಂಗಳ  ಕಂದ  ಝರಾ ಜೊತೆ ತನ್ನ ದೇಶ ಬಿಟ್ಟು  ಟರ್ಕಿಯಲ್ಲಿ ನೆಲಸಬೇಕಾದ  ಸ್ಥಿತಿ ಎದುರಾಗುತ್ತದೆ.  ‘ನಾನೇನು ಯುದ್ಧ ವರದಿಗಾರ್ತಿಯಾಗಬೇಕೆಂದು ಇಷ್ಟ ಪಟ್ಟಿರಲಿಲ್ಲ….. ಆದರೆ ಯುದ್ಧ ನನ್ನ ಮನೆ ಬಾಗಿಲಿಗೇ ಬಂತು’  ಎನ್ನುತ್ತಾರೆ  ಸಿರಿಯಾದ ಈ ಪ್ರಶಸ್ತಿ ಪುರಸ್ಕೃತ ಪತ್ರಕರ್ತೆ.

(ನೂಪುರ್ ಬಸು)

ವಿಶ್ವದ ವಿವಿಧ ಭಾಗಗಳಿಂದ  ವರದಿಗಳನ್ನು , ಕಥಾನಕಗಳನ್ನು ಹೊರ ಜಗತ್ತಿಗೆ ತರಲು ಸೆಣಸುವ ಈ ಪತ್ರಕರ್ತೆಯರಿಗಾಗಿ ಹೆಚ್ಚು ಬೆಂಬಲ ಏಕೆ ವ್ಯಕ್ತವಾಗುವುದಿಲ್ಲ? ಇಂತಹ ಮುಖ್ಯ ಪ್ರಶ್ನೆಗಳನ್ನು  ‘ವೆಲ್ವೆಟ್ ರೆವಲ್ಯೂಷನ್’ ಕೇಳುತ್ತದೆ.

ಕಾರ್ಯನಿರ್ವಾಹಕಿ ನಿರ್ಮಾಪಕಿಯಾಗಿ ವಿಶ್ವದ ವಿವಿಧ ಭಾಗಗಳ ಮಹಿಳಾ ನಿರ್ದೇಶಕಿಯರೊಂದಿಗೆ ನೂಪುರ್ ಬಸು ಅವರು ಈ ಚಿತ್ರದ ಕಥಾನಕವನ್ನು ನಿರೂಪಿಸುತ್ತಾ ಹೋಗುತ್ತಾರೆ.

ಅಮೆರಿಕ ಮೂಲದ ಬಾಂಗ್ಲಾದೇಶದ  ದಿಟ್ಟ ಬ್ಲಾಗರ್ ರಫೀದಾ ಬೊನ್ಯಾ ಅಹಮದ್‌ ಅವರ ಮನ ಕರಗಿಸುವ ಕಥಾನಕ ಈ ಚಿತ್ರದಲ್ಲಿದೆ.  ಎರಡು ವರ್ಷಗಳ ಹಿಂದೆ ಪತಿ ಜೊತೆ ಬಾಂಗ್ಲಾದೇಶಕ್ಕೆ ಭೇಟಿ ನೀಡಿದಾಗ ಬೋನ್ಯಾ ಮೇಲೆ ಮಚ್ಚುಗತ್ತಿ ಹಿಡಿದ  ಧಾರ್ಮಿಕ ಮೂಲಭೂತವಾದಿಗಳ ಗುಂಪಿನಿಂದ ಕ್ರೂರ ಹಲ್ಲೆ ನಡೆಯಿತು. ಕಣ್ಣೆದುರೇ  ಪತಿ ಅವಿಜಿತ್ ರಾಯ್  ಹತ್ಯೆಯಾಯಿತು.  ಈಗ ಬೋನ್ಯಾ ಅವರು ಅಮೆರಿಕದಲ್ಲೇ  ಮಗಳೊಡನೆ ನೆಲೆಸಿದ್ದು ‘ಮುಕ್ತೊಮಾನಾ’  ಬಂಗಾಳಿ ವೆಬ್‌ಸೈಟ್   ನೋಡಿಕೊಳ್ಳುತ್ತಿದ್ದಾರೆ.  ಈ ಮೊದಲು ಪತಿ ನೋಡಿಕೊಳ್ಳುತ್ತಿದ್ದ  ಈ ವೆಬ್ ಸೈಟ್ ವಿಚಾರವಾದ ಹಾಗೂ ಮುಕ್ತ ಚೆಂತನೆಗಳಿಗೆ ಅಭಿವ್ಯಕ್ತಿ ನೀಡುತ್ತಿದೆ.

ಈ ದುರಂತ ಘಟನೆಯ  ನಂತರ  ಅಮೆರಿದಲ್ಲಿದ್ದ  ಬೊನ್ಯಾ ಅವರನ್ನು ಸಂಪರ್ಕಿಸಿ  ಅವರ ಮನ ಒಲಿಸಿ ಈ ಸಾಕ್ಷ್ಯಚಿತ್ರಕ್ಕಾಗಿ   ಸಂದರ್ಶನ ಪಡೆದುಕೊಳ್ಳಲಾಯಿತು.  ಎಫ್‌ಬಿಐ  ಕಣ್ಗಾವಲಿನ  ಅವರ ಭದ್ರತೆ ವ್ಯವಸ್ಥೆಗೆ ಚ್ಯುತಿ ಬಾರದಂತೆ  ಚಿತ್ರೀಕರಣದ ವೇಳೆ ಸೂಚನೆಗಳನ್ನು ಪಾಲಿಸಬೇಕಾದುದೂ ಅಗತ್ಯವಾಗಿತ್ತು ಎನ್ನುತ್ತಾರೆ ನೂಪುರ್.

ಬಿಬಿಸಿಯ ಮುಖ್ಯ ಅಂತರರಾಷ್ಟ್ರೀಯ ವರದಿಗಾರ್ತಿ ಲೈಸ್ ಡೌಸೆಟ್, ಅಫ್ಗಾನಿಸ್ತಾನದ ಖ್ಯಾತ ಪತ್ರಕರ್ತೆ  ನಜೀಬಾ ಅಯುಬಿ ಹಾಗೂ ಭಾರತದಿಂದ ಪನಾಮಾ ಪೇಪರ್ಸ್ ತನಿಖೆಗೆ ಕೆಲಸ ಮಾಡಿದ ರಿತು ಸಾರಿನ್ ಮತ್ತು  ಅಮೆರಿಕದ ಇಂಟರ್ ನ್ಯಾಷನಲ್ ಕನ್ಷಾರ್ಷಿಯಮ್ ಆಫ್ ಇನ್ವೆಸ್ಟಿಗೇಟಿವ್ ಜರ್ನಲಿಸಂ ( ಐಸಿಐಜೆ)  ಉಪ ನಿರ್ದೇಶಕಿ ಮರೀನಾ ವಾಕರ್ ಅವರನ್ನು ನೂಪುರ್ ಬಸು ವೈಯಕ್ತಿಕವಾಗಿ ಸಂದರ್ಶನ ಮಾಡಿದ್ದಾರೆ. ಇದು ಜಾಗತಿಕ ದೃಷ್ಟಿಕೋನ ಹಾಗೂ ಸ್ಪರ್ಶವನ್ನು ಚಿತ್ರಕ್ಕೆ ನೀಡಿದೆ.

(ಝೈನಾ ಎರ್ಹಾಯಮ್‌)

‘ದಿ ಇಂಡಿಯನ್ ಎಕ್ಸ್‌ಪ್ರೆಸ್’ ಪತ್ರಿಕೆಯ ನ್ಯೂಸ್ ಮತ್ತು ಇನ್‍ವೆಸ್ಟಿಗೇಷನ್ಸ್ ಸಂಪಾದಕಿ ರಿತು ಸಾರಿನ್ ಅವರು  ಭಾರತದಲ್ಲಿ ‘ಪನಾಮಾ ಪೇಪರ್ಸ್ ’ ತನಿಖೆಯ ಉಸ್ತುವಾರಿ ವಹಿಸಿಕೊಂಡಿದ್ದರು. ಮಾಹಿತಿಗಳು, ಅಂಕಿಅಂಶಗಳನ್ನು ಭಾರಿ ಪ್ರಮಾಣದಲ್ಲಿ ಕಲೆ ಹಾಕಬೇಕಾದ ಇಂತಹ ದೊಡ್ಡ ಜವಾಬ್ದಾರಿಯ  ಹುದ್ದೆಯ ಹೊಣೆಗಾರಿಕೆಯನ್ನು ಸಾಮಾನ್ಯವಾಗಿ  ಪುರುಷ ಪತ್ರಕರ್ತನಿಗೆ ನೀಡುವುದು ಮಾಮೂಲು. ಆದರೆ ಇತರ ಇಬ್ಬರು ಪುರುಷ ಸಹೋದ್ಯೋಗಿಗಳೊಂದಿಗೆ ನಾಯಕತ್ವದ ಹೊಣೆ ಹೊತ್ತುಕೊಳ್ಳುವಲ್ಲಿ ತಮಗೇನೂ ಸಮಸ್ಯೆ ಇರಲಿಲ್ಲ ಎಂದು  ರಿತು ಹೇಳುತ್ತಾರೆ.

ಸಿರಿವಂತರು ಹಾಗೂ ಪ್ರಭಾವಿಗಳು ಹೊರ ದೇಶಗಳಲ್ಲಿ ಹೊಂದಿರುವ ಅಕ್ರಮ ಸಂಪತ್ತಿನ  ರಹಸ್ಯಗಳನ್ನು  ಪನಾಮಾ ಪೇಪರ್ಸ್ ತನಿಖೆ ಬಯಲು ಮಾಡಿತು.  ಭ್ರಷ್ಟ ರಾಜಕಾರಣಿಗಳು ಹಾಗೂ ಶಿಕ್ಷೆಗೊಳಗಾದ ಅಪರಾಧಿಗಳ ಅಕ್ರಮ ಸಂಪತ್ತನ್ನು ಬಯಲಿಗೆಳೆದ  ಈ ಅತಿ ದೊಡ್ಡ ಡಿಜಿಟಲ್ ಡೇಟಾ  ವಿಶ್ಲೇಷಣೆಯಲ್ಲಿ ಸುಮಾರು 80 ರಾಷ್ಟ್ರಗಳ  300 ಪತ್ರಕರ್ತರು ಪಾಲ್ಗೊಂಡಿದ್ದರು. ಈ ಪೈಕಿ ಮೂರನೇ ಒಂದರಷ್ಟು ಮಂದಿ ಮಹಿಳೆಯರಿದ್ದರು  ಎಂಬುದು ದೊಡ್ಡದು. ಒಂದು ದಶಕದ ಹಿಂದೆ ಇಂತಹ ಸನ್ನಿವೇಶ ಸಾಧ್ಯವಿರುತ್ತಿರಲಿಲ್ಲ.

ಐಸಿಐಜೆ  ಉಪ ನಿರ್ದೇಶಕಿ ಮರೀನಾ ವಾಕರ್ ಮಾತುಗಳಿವು: ‘19 ವರ್ಷಗಳ ಹಿಂದೆ ಐಸಿಐಜೆ ಆರಂಭಿಸಿದಾಗ,  ಇದು ಪೂರ್ಣವಾಗಿ ಪುರುಷ ಪ್ರಧಾನವಾಗಿತ್ತು…… ನಂತರದ ವರ್ಷಗಳಲ್ಲಿ ವಿಶ್ವದಾದ್ಯಂತ  ಈ ಚಿತ್ರಣ ನಾಟಕೀಯ ರೀತಿಯಲ್ಲಿ ಬದಲಾಗಿದೆ.  ವಿಶ್ವದಾದ್ಯಂತ ಹೆಚ್ಚು ಹೆಚ್ಚು ಮಹಿಳೆಯರು ತನಿಖಾ ತಂಡಗಳ ನಾಯಕತ್ವ ವಹಿಸುತ್ತಿದ್ದಾರೆ. ಆದರೆ  ಪನಾಮಾ ಪೇಪರ್ಸ್ ಗಾಗಿ ಕೆಲಸ ಮಾಡಿದ ಅನೇಕ ಮಹಿಳೆಯರು ತೀವ್ರ ದಮನಕಾರಿ  ಸಮಾಜಗಳಲ್ಲಿ ಬದುಕುತ್ತಿದ್ದಾರೆ. ತಮ್ಮ ರಾಷ್ಟ್ರ ನಾಯಕರ ವಿದೇಶಗಳಲ್ಲಿರುವ ಸಂಪತ್ತಿ ನ ಬಗ್ಗೆ ವರದಿ ಮಾಡಿದ್ದಕ್ಕಾಗಿ ತಿಂಗಳುಗಟ್ಟಲೆ ಜೈಲುಗಳಲ್ಲಿ  ಕಳೆಯಬೇಕಾಗಿ ಬಂದಿದೆ. ಭ್ರಷ್ಟಾಚಾರ, ಬಡತನ, ಮಾಫಿಯಾ, ರಾಜಕಾರಣ ಹಾಗೂ ಪರಿಸರ ನಾಶ ಕುರಿತ  ಸ್ಟೋರಿಗಳ ಬೆನ್ನು ಬೀಳುವ ಪತ್ರಕರ್ತೆಯರ ಮೇಲಿನ ಆಕ್ರಮಣಗಳೂ ತೀವ್ರವಾಗುತ್ತಿವೆ.’

ಧ್ರುವೀಕರಣಗೊಂಡಿರುವ ಸಮಾಜದಲ್ಲಿ ಪತ್ರಕರ್ತೆಯರ ದಿನನಿತ್ಯದ ಹೋರಾಟ ಎದ್ದು ಕಾಣಿಸುವಂತಹದ್ದು. ಸುದ್ದಿಮನೆಗಳಲ್ಲಿ ಹಾಗೂ  ಹೊರ ಪ್ರಪಂಚದಲ್ಲಿ  ಲಿಂಗತ್ವ ತಾರತಮ್ಯಗಳನ್ನು ಮಹಿಳೆಯರು ದಿನನಿತ್ಯ ಎಂಬಂತೆ ಎದುರುಗೊಳ್ಳುತ್ತಿರುತ್ತಾರೆ. ಅದರಲ್ಲೂ ಸಂಘರ್ಷ ವಲಯಗಳಲ್ಲಿ ವರದಿಗಾರಿಕೆ ಮಾಡುವುದೆಂದರೆ ಇನ್ನೂ ಅಪಾಯಕಾರಿ. ಅಫ್ಗಾನಿಸ್ತಾನ, ಬ್ರೆಜಿಲ್, ಪಾಕಿಸ್ತಾನ, ಸಿರಿಯಾದಂತಹ ರಾಷ್ಟ್ರಗಳಲ್ಲಿ  ಅನೇಕ  ವರದಿಗಾರ್ತಿಯರು ಇದಕ್ಕಾಗಿ ಜೀವ  ಕಳೆದುಕೊಂಡಿದ್ದಾರೆ.

2015ರ ಸೆಪ್ಟೆಂಬರ್‌ನಲ್ಲಿ ಸಿರಿಯಾದ ರಖಾದಲ್ಲಿ  ಸಿರಿಯಾದ ಸ್ವತಂತ್ರ ಪತ್ರಕರ್ತೆ ಹಾಗೂ ಬ್ಲಾಗರ್  ರುಖಿಯಾ ಹಸನ್  ಅವರ ಹತ್ಯೆಯಾಗಿದ್ದು ಜಗತ್ತನ್ನು ತಲ್ಲಣಗೊಳಿಸಿತ್ತು.  ಐಎಸ್ ಉಗ್ರರಿಂದ ಹತ್ಯೆಯಾದ  ಮೊದಲ  ಮಹಿಳಾ ವರದಿಗಾರ್ತಿ ಇವರು.  ಬಹಿರಂಗವಾಗಿ ಐಎಸ್ ಉಗ್ರ ಸಿದ್ಧಾಂತಗಳ ಟೀಕಾಕಾರರಾಗಿದ್ದರು ರುಖಿಯಾ.  ಪ್ರಭುತ್ವ  ಅಥವಾ ಐಎಸ್‌ನಂತಹ ಪ್ರಭುತ್ವದ ಹೊರಗಿನ ಉಗ್ರ ಸಿದ್ಧಾಂತಗಳ ಶಕ್ತಿಗಳ  ಆಕ್ರಮಣಗಳಿಗೆ ಮಹಿಳೆಯರೂ ಗುರಿಯಾಗುತ್ತಿರುವುದಕ್ಕೆ ಇದು ದ್ಯೋತಕ. ‘ಸಂಘರ್ಷಗಳ ವಲಯದಲ್ಲಿ ಎಲ್ಲಾ ಪತ್ರಕರ್ತರೂ ಲಿಂಗಭೇದವಿಲ್ಲದೆ ಅಪಾಯ ಎದುರಿಸುತ್ತಾರೆ ಎಂಬುದು ನಿಜ. ಆದರೆ ಮಹಿಳೆಗೆ ಈ ಅಪಾಯ ಇನ್ನೂ ಹೆಚ್ಚು. ಅತ್ಯಾಚಾರದ ಬೆದರಿಕೆ ಇದಕ್ಕೆ ಕಾರಣ’ ಎನ್ನುತ್ತಾರೆ ನೂಪುರ್ ಬಸು.

ವಿಭಿನ್ನ ಜಾತಿ, ಜನಾಂಗ ಹಾಗೂ ವರ್ಗಗಳಿರುವ ಸಮಾಜದಲ್ಲಿ ಎಲ್ಲಾ ಪತ್ರಕರ್ತೆಯರನ್ನು ಒಂದೇ ತಕ್ಕಡಿಯಲ್ಲಿ ನೋಡಲಾಗುವುದಿಲ್ಲ ಎಂಬ ಪ್ರಜ್ಞೆಯೂ ಈ ಚಿತ್ರದಲ್ಲಿ ಬಿಂಬಿತವಾಗಿದೆ.

ಜಾತಿ ಹಾಗೂ ಜನಾಂಗ ಸಹ ಈ ಮಹಿಳೆಯರು ಎದುರಿಸುವ ಕಷ್ಟವನ್ನು ಎಷ್ಟು ಹೆಚ್ಚು ಮಾಡುತ್ತದೆ ಎಂಬುದನ್ನು  ಈ ಚಿತ್ರ ಎತ್ತಿ ತೋರಿಸುತ್ತದೆ. ಕ್ಯಾಮೆರೂನ್  ರೇಡಿಯೊ ಪತ್ರಕರ್ತೆ ಮೌಸಾ ಮರಾಂಡಾಟಾ  ತನ್ನ ದೇಶದಲ್ಲಿ ಪುರುಷರಿಂದ  ಪದೇ ಪದೇ ಎದುರಿಸಬೇಕಾದ ಸವಾಲು ಹಾಗೂ ಅವಮಾನಗಳ ಬಗ್ಗೆ ಹೇಳುತ್ತಾರೆ.

‘ಮಹಿಳಾ ನವೋದಯ’ ಎಂಬ ತೆಲುಗು  ಪತ್ರಿಕೆಗೆ ವರದಿ ಮಾಡುವ ಭಾರತಿ ಎಂಡಪಲ್ಲಿ  ತಮ್ಮ ಸಮುದಾ ಎದುರಿಸುವ ತಾರತಮ್ಯ ಕುರಿತು ಹೇಳುತ್ತಾರೆ.  ನವೋದಯ ತೆಲುಗು ಪತ್ರಿಕೆಯನ್ನು ದಲಿತ ಮಹಿಳೆಯರೇ  ಹೊರ ತರುತ್ತಿದ್ದಾರೆ ಎಂಬುದು ವಿಶೇಷ.

(ಮಾಲಿನಿ ಸಬ್ರಮಣಿಯಮ್‌)

‘ಮೇಲ್ಜಾತಿ ಜನರ ಮನೆಗಳಿಗೆ ಹೋದಾಗ ನಮ್ಮನ್ನು ಹೊರಗೆ ನಿಲ್ಲುವಂತೆ ಮಾಡಲಾಗುತ್ತದೆ. ನಾವು ಪತ್ರಕರ್ತೆಯರಾಗಿದ್ದು ಅವರನ್ನು ಸಂದರ್ಶನ ಮಾಡಲು ಹೋಗಿದ್ದರೂ ಈ ಸಮಸ್ಯೆ ಎದುರಿಸಬೇಕು’ ಎನ್ನುತ್ತಾರೆ ಮಹಿಳಾ ನವೋದಯ ಪತ್ರಿಕೆಯ ಸಂಸ್ಥಾಪಕಿ. ಅಲ್ಪ ಪ್ರಮಾಣದ ಬಂಡವಾಳದೊಂದಿಗೆ ಆರಂಭವಾದ  ಈ ಪತ್ರಿಕೆ ಈಗ 40,000 ಪ್ರತಿಗಳ ಪ್ರಸರಣ ಹೊಂದಿದೆ. ಓದುಗರ ಸಂಖ್ಯೆ 200000.

ಇಂಟರ್ ನ್ಯಾಷನಲ್ ಅಸೋಸಿಯೇಷನ್ ಆಫ್ ವಿಮೆನ್ ಇನ್ ರೇಡಿಯೊ ಅಂಡ್ ಟೆಲಿವಿಷನ್ (ಐ ಎ ಡಬ್ಲ್ಯುಆರ್‌ಟಿ) ನಿರ್ಮಿಸಿದ  ಸಹಭಾಗಿತ್ವದ ಸಾಕ್ಷ್ಯಚಿತ್ರ  ಇದು. ಈ ಚಿತ್ರದ ಶೀರ್ಷಿಕೆ  ‘ವೆಲ್ವೆಟ್ ರೆವಲ್ಯೂಷನ್ ’ಧ್ವನಿಪೂರ್ಣವಾದ ರೂಪಕ,  ‘ಮೆಲುದನಿಯಲ್ಲಿ  ಗಟ್ಟಿಯಾದ, ಆಳವಾದ   ಪರಿಣಾಮ ಬೀರುವಂತಹದ್ದು   ಎಂದರ್ಥ ’ ಎಂದು ನೂಪುರ್ ಬಸು ವ್ಯಾಖ್ಯಾನಿಸುತ್ತಾರೆ. ‘ವಿಶ್ವದಾದ್ಯಂತ ಪತ್ರಕರ್ತೆಯರ ಸದ್ಯದ ಕ್ಷಣಗಳನ್ನು ಹಾಗೂ  ಅವರು ಎದುರಿಸುತ್ತಿರುವ ಸವಾಲುಗಳನ್ನು  ಹಿಡಿದಿಡಬೇಕೆಂದು ನನ್ನ ಅಪೇಕ್ಷೆಯಾಗಿತ್ತು’ ಎನ್ನುತ್ತಾರೆ ಅವರು.   ಮುದ್ರಣ, ರೇಡಿಯೊ ಟೆಲಿವಿಷನ್ ಹಾಗೂ ಡಿಜಿಟಲ್ ಮಾಧ್ಯಮಗಳಲ್ಲಿ ತೊಡಗಿಕೊಂಡಿರುವ ಪತ್ರಕರ್ತೆಯರ  ಜೀವನಕಥೆಗಳಿವು. 2014ರ ನಂತರ  ಐ ಎ ಡಬ್ಲ್ಯು ಆರ್ ಟಿ ನಿರ್ಮಿಸುತ್ತಿರುವ ಮೂರನೇ ಸುದೀರ್ಘ ಅವಧಿಯ ಸಾಕ್ಷ್ಯ ಚಿತ್ರ ಇದು. ಈ ಹಿಂದಿನ ಎರಡು ಸಾಕ್ಷ್ಯಚಿತ್ರಗಳು  ಮಹಿಳೆ ಹಾಗೂ ಹವಾಮಾನ ಬದಲಾವಣೆ ಮತ್ತು ಪ್ರಜನನ ಹಕ್ಕುಗಳಿಗೆ ಸಂಬಂಧಿಸಿದ್ದಾಗಿತ್ತು.

‘ವೆಲ್ವೆಟ್’  ರೆವಲ್ಯೂಷನ್’ ಚಿತ್ರ ತಯಾರಿಕೆಯ ಹೊಣೆ ಹೆಗಲೇರಿದಾಗ  ಸುದ್ದಿಮನೆಗಳಲ್ಲಿ ಹೆಣ್ಣು ಮಕ್ಕಳ ಪ್ರವೇಶ ತಡೆಯುವ ಸಂಪಾದಕರ ಕಥಾನಕಗಳಾಚೆಗಿನ ಕಥಾನಕಗಳನ್ನು ಬಿಂಬಿಸುವುದು ನೂಪುರ್ ಬಸು ಉದ್ದೇಶವಾಗಿತ್ತು. ಬಹುಶಃ ಇಂತಹ ಕಥಾನಕ 20 ವರ್ಷಗಳ ಹಿಂದೆ ಸರಿಹೊಂದುತ್ತಿತ್ತು. ಆದರೆ ಈಗ ಮಹಿಳೆಯೆರು ಈ ಕ್ಷೇತ್ರದಲ್ಲಿದ್ದು ಅನೇಕ ಸವಾಲುಗಳನ್ನು ಎದುರಿಸುತ್ತಿದ್ದಾರೆ ಎಂಬುದು ಮುಖ್ಯ ಎನ್ನುತ್ತಾರೆ.

2015ರಲ್ಲಿ ‘ಪತ್ರಿಕೋದ್ಯಮದಲ್ಲಿ ಡಿಜಿಟಲ್ ಸಮೀಕ್ಷೆಯೊಂದನ್ನು ನಿರ್ಮಿಸುವತ್ತ ...’ ಎಂಬ  ಸಮೀಕ್ಷಾ ವರದಿಯನ್ನು  ಯುನೆಸ್ಕೊ ಪ್ರಕಟಿಸಿತ್ತು. ಆನ್‌ ಲೈನ್‌ನಲ್ಲಿ  ನಕಾರಾತ್ಮಕ ಹಾಗೂ ಬೆದರಿಕೆ ಹಾಕುವಂತಹ ಪ್ರತಿಕ್ರಿಯೆಗಳನ್ನು  ಪುರುಷ ಸಹೋದ್ಯೋಗಿಗಳಿಗೆ ಹೋಲಿಸಿದರೆ ಪತ್ರಕರ್ತೆಯರು ಹೆಚ್ಚು ಎದುರಿಸುತ್ತಾರೆ.  ಏಕೆಂದರೆ ಅವರು ವೃತ್ತಿಪರರಾಗಿ ಹಾಗೂ ಮಹಿಳೆಯರಾಗಿ  ಎರಡು ಬಗೆಯಲ್ಲಿ  ದಾಳಿಗೆ ಒಳಗಾಗುತ್ತಾರೆ ಎಂದು ಈ ವರದಿ ಹೇಳಿತ್ತು.

ಸಂಘರ್ಷ್, ಲಿಂಗತ್ವ ಹಾಗೂ ಮಾಧ್ಯಮ ಎಂಬುದು ಅಪಾಯಕಾರಿ ಮಿಶ್ರಣವಾಗಿದ್ದು  ಅನೇಕ ಪತ್ರಕರ್ತೆಯರ ಜೀವಕ್ಕೇ ಎರವಾಗುತ್ತಿದೆ ಎಂಬುದು ದುರದೃಷ್ಟಕರ.   ಇಂತಹ ಸಂದರ್ಭದಲ್ಲಿ ಗೌರಿ ಲಂಕೇಶ್‌ರ ಹತ್ಯೆಯಂತಹ ಅಮಾನವೀಯ ಪ್ರಕರಣಗಳ ವಿರುದ್ಧ ನಾಗರಿಕ ಸಮಾಜದ ಬೆಂಬಲ  ಹೆಚ್ಚಾಗಬೇಕು.

**

(ರಫೀದಾ ಬೊನ್ಯಾ ಅಹಮದ್‌)

ಇನ್ನೂ ಮೀರಲಾಗದ ಗಡಿರೇಖೆಗಳು

‘ನೀನಲ್ಲಿಗೆ ಹೋಗಬಾರದು. ಏಕೆಂದರೆ ನೀನು ಮಹಿಳೆ ಎಂದು ಬಿ.ಬಿ.ಸಿ ನನಗೆ ಹೇಳಿದ್ದು ನೆನಪಿಲ್ಲ. ಆದರೆ ಕ್ರಮೇಣ ಅಮೆರಿಕನ್ ಟೆಲಿವಿಷನ್ ವಾಹಿನಿಗಳಲ್ಲಿ , ಕಳುಹಿಸುವುದಾದರೆ ಪುರುಷರನ್ನು ಕಳಿಸುತ್ತೇವೆ ಎನ್ನುವಂತಹ ಮಾತುಗಳು ಕೇಳಿಬರುತ್ತಿವೆ ’ ಎನ್ನುತ್ತಾರೆ ಬಿ.ಬಿ.ಸಿ ಪತ್ರಕರ್ತೆ ಲೈಸ್ ಡೌಸೆಟ್.

* ‘ಮಾಧ್ಯಮ ಸಂಸ್ಥೆಗಳಲ್ಲಿ ಎತ್ತರಕ್ಕೆ ತಲುಪಿದವರ ಹಿಂದೆ ಹೋರಾಟದ ಕಥೆ ಇರುತ್ತದೆ. ಹೀಗಿದ್ದೂ ಪ್ರಧಾನ ಸಂಪಾದಕರ ಹುದ್ದೆಯನ್ನು ಮಹಿಳೆಯರಿಗೆ ನೀಡುವುದು ಕಡಿಮೆ ಎನ್ನುವುದನ್ನು ಒಪ್ಪಿಕೊಳ್ಳುತ್ತೇನೆ ’ ಎನ್ನುತ್ತಾರೆ ಹಿರಿಯ ಪತ್ರಕರ್ತೆ ರಿತು ಸಾರಿನ್.

* ‘ಅಫ್ಗನಿಸ್ತಾನದಲ್ಲಿ ಮಹಿಳಾ ಪತ್ರಕರ್ತರಾಗಬೇಕಾದರೆ ಮೊದಲು ಮನೆಯಿಂದ ಹೋರಾಡಲು ಪ್ರಾರಂಭಿಸಬೇಕು’ ಎನ್ನುತ್ತಾರೆ ಆಫ್ಘನ್ ಪತ್ರಕರ್ತೆ ನಜೀಬಾ ಅಯುಬಿ.

* ತಪಾಸಣಾ ಕೇಂದ್ರವೊಂದರಲ್ಲಿ ‘ನೀವು ವಿದೇಶಿ ಪತ್ರಕರ್ತೆ’ ಎಂದ ಸಿಬ್ಬಂದಿಗೆ ‘ಇಲ್ಲ ನಾನು ಸಿರಿಯಾದವಳು’ ಎಂದು ಸಿರಿಯನ್ ಉಪಭಾಷೆಯಲ್ಲೇ ಉತ್ತರಿಸಿದರೂ ಆತನಿಗೆ ಒಪ್ಪಲಾಗುತ್ತಿಲ್ಲ. ‘ನೀವು ವಿದೇಶಿ ಮಹಿಳೆಯೇ ಹೌದು. ಏಕಕಾಲದಲ್ಲಿ ಸಿರಿಯನ್, ಪತ್ರಕರ್ತೆ ಹಾಗೂ ಮಹಿಳೆಯಾಗಿ ಇರುವುದು ಖಂಡಿತಾ ಸಾಧ್ಯವಿಲ್ಲ.’ ಎಂಬ ಉತ್ತರ ಸಿಕ್ಕಿದ್ದು ಸಿರಿಯಾ ಪತ್ರಕರ್ತೆ ಝೈನಾ ಎರ್ಹಾಯಮ್‌ಗೆ.

Read More

Comments
ಮುಖಪುಟ

ಕನ್ನಡ ಪಾಠ ಮಾಡಲು ಅವಕಾಶ ಕೊಡುತ್ತಿಲ್ಲವೆಂದು ಶಿಕ್ಷಕನ ಪ್ರತಿಭಟನೆ

ಕನ್ನಡ ಶಿಕ್ಷಕ ನಮ್ಮ ಶಾಲೆಗೆ ಬೇಕಿಲ್ಲ ಎಂದು ಎಸ್‌ಡಿಎಂಸಿಯವರು ಹೇಳುತ್ತಾರೆ. ಶಾಲೆಗೆ ಹೋದರೆ ಹಲವು ರೀತಿಯಲ್ಲಿ ತೊಂದರೆ ಕೊಡುತ್ತಿದ್ದಾರೆ. ಇದನ್ನು ಬಿಇಒ ಸೇರಿದಂತೆ ಇಲಾಖೆಯ ಅಧಿಕಾರಿಗಳ ಗಮನಕ್ಕೆ ತಂದರೂ ಪ್ರಯೋಜನ ಆಗಿಲ್ಲ ಎಂದು ಕನ್ನಡ ಶಿಕ್ಷಕ ವಿ‌‌.ಜಿ. ಬಾಳೇಕುಂದ್ರಿ ದೂರಿದರು.

ಯೋಗೀಶ್‌ ಗೌಡ ಹತ್ಯೆ ಪ್ರಕರಣ: ಕಾಂಗ್ರೆಸ್‌–ಬಿಜೆಪಿ ಕಾರ್ಯಕರ್ತರ ಮುಖಾಮುಖಿ

ಯೋಗೀಶಗೌಡ ಹತ್ಯೆ ಪ್ರಕರಣದಲ್ಲಿ ಸಚಿವ ವಿನಯ ಕುಲಕರ್ಣಿ ಕೈವಾಡವಿದ್ದು, ಸತ್ಯ ಹೊರಬರಬೇಕಾದರೆ ಪ್ರಕರಣವನ್ನು ಸಿಬಿಐ ತನಿಖೆಗೆ ಒಪ್ಪಿಸಬೇಕು ಎಂದು ಬಿಜೆಪಿ ಕಾರ್ಯಕರ್ತರು ಆಗ್ರಹಿಸಿದರು.

ಧರ್ಮದ ಹೆಸರಿನಲ್ಲಿ ಉಪಟಳ ನೀಡುವವರನ್ನು ಹತ್ತಿಕ್ಕಬೇಕು: ಸುತ್ತೂರು ಮಠದ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ

ಧರ್ಮದ ಹೆಸರಿನಲ್ಲಿ ಸಮಾಜಕ್ಕೆ ಉಪಟಳ ನೀಡುತ್ತಿರುವವರನ್ನು ಹತ್ತಿಕ್ಕಬೇಕು. ಇಲ್ಲವಾದರೆ ಹಿಂದೂ ಧರ್ಮಕ್ಕೆ ಅಪಾಯವಿದೆ ಎಂದು ಸುತ್ತೂರು ಮಠದ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಎಚ್ಚರಿಸಿದರು.

ದೇಶ ರಾಮರಾಜ್ಯ ಆಗಬೇಕು: ತೋಗಾಡಿಯಾ

ಉಡುಪಿಯಲ್ಲಿ ನಡೆಯುತ್ತಿರುವ ಧರ್ಮ ಸಂಸತ್‌ ಸಮ್ಮೇಳನದಲ್ಲಿ ಮಾತನಾಡಿದ ಅವರು, ಹಿಂದೂ ದೇವಾಲಯಗಳ ಆಡಳಿತವನ್ನು ಸರ್ಕಾರಗಳು ನಿರ್ವಹಿಸುವುದು ಸಂವಿಧಾನ ವಿರೋಧಿಯಾಗಿದ್ದು, ಜಾತ್ಯಾತೀತ ಸಂವಿಧಾನಕ್ಕೆ ಮಾಡುವ ಅಪಚಾರ ಎಂದರು.

ಸಂಗತ

ತೂಕತಪ್ಪಿದ ಮಾತುಗಳಿಗೆ ಬೇಕು ಕಡಿವಾಣ

ಪರಸ್ಪರರ ನಿಂದನೆಗೆ ಕೀಳು ಅಭಿರುಚಿಯ ಮಾತುಗಳನ್ನಾಡುವ ರಾಜಕೀಯ ನಾಯಕರ ಸಂಸ್ಕೃತಿ ಪ್ರಶ್ನಾರ್ಹ

ಇವರದು ಸೇವೆಯಲ್ಲ, ಉದ್ಯೋಗವಷ್ಟೇ

‘ಹೋಟೆಲ್‌ನವರು ರೇಟ್ ನಿರ್ಧರಿಸಬಹುದು, ಲಾಜ್‌ನವರು ನಿರ್ಧರಿಸಬಹುದು, ನಾವೇಕೆ ನಮ್ಮ ದರಗಳನ್ನು ನಿರ್ಧರಿಸುವಂತಿಲ್ಲ’ ಎಂದು ಪ್ರಶ್ನಿಸುತ್ತ ಅವರು ತಮ್ಮ ಸ್ಥಾನವನ್ನು ಉಳಿದೆಲ್ಲ ಉದ್ದಿಮೆಗಳ ಮಟ್ಟಕ್ಕೆ ತಂದಿಟ್ಟುಬಿಟ್ಟಿದ್ದಾರೆ. ಜನರ ದಯನೀಯ ಸ್ಥಿತಿ ಬಳಸಿಕೊಂಡು ಲಾಭ ಮಾಡಿಕೊಳ್ಳುವವರು ಸೇವಾ ನಿರತರೇ?

ಹಗಲು ಕವಿದ ಅಮಾವಾಸ್ಯೆ ಕತ್ತಲು

ಅಲ್ಲದೇ ಟಿ.ವಿ. ವಾಹಿನಿಗಳ ಮೇಲೆ ನಿಬಂಧನೆಯನ್ನು ಹೇರುವ ‘ಕೇಬಲ್‌ ಟೆಲಿವಿಷನ್ ನೆಟ್‌ವರ್ಕ್ (ರೆಗ್ಯುಲೇಷನ್) ಆ್ಯಕ್ಟ್, 1995’ ಹಲವು ನಿಬಂಧನೆಗಳೊಂದಿಗೆ ‘ಅರೆಸತ್ಯವಾದ, ಅತೀಂದ್ರಿಯ ನಂಬಿಕೆ ಅಥವಾ ಕುರುಡು ನಂಬಿಕೆಗಳನ್ನು ಪ್ರೋತ್ಸಾಹಿಸುವಂಥ’ ಕಾರ್ಯಕ್ರಮಗಳನ್ನು ಬಿತ್ತರಿಸಲು ನಿಷೇಧವಿದೆ. ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಇದನ್ನು ಕಟ್ಟುನಿಟ್ಟಾಗಿ ಜಾರಿಗೆ ತರಬೇಕು.

‘ಜ್ಞಾನ’ಚಾಲಿತ ವಸಾಹತೀಕರಣದ ಹೊಸ ಆವೃತ್ತಿ

ನಮಗೆ ಹೊಸ ಜ್ಞಾನ ಬೇಕು. ಆದರೆ ಅದು ಅಸಹಜ ಕಸರತ್ತುಗಳ ಮೂಲಕ ಕನ್ನಡದ ಕನ್ನಡಿಯಲ್ಲಿ ಮೂಡಬಲ್ಲ ಪ್ರತಿಬಿಂಬವಾಗಿ ಅಲ್ಲ.

ಚಂದನವನ

‘ಅತಿರಥ’ನಾಗಿ ಚೇತನ್

‘ಅತಿರಥ’ ಚಿತ್ರದಲ್ಲಿ ಅವರದ್ದು ಟಿ.ವಿ. ಪತ್ರಕರ್ತನ ಪಾತ್ರ. ಮಹೇಶ್‌ ಬಾಬು ನಿರ್ದೇಶನದ ಈ ಚಿತ್ರ ಇಂದು(ನ. 24) ತೆರೆಕಾಣುತ್ತಿದೆ. ಈ ಕುರಿತು ಚೇತನ್‌ ಅವರೊಂದಿಗೆ ನಡೆಸಿದ ಮಾತುಕತೆ ಇಲ್ಲಿದೆ.

ಚಿನ್ನದ ಹುಡುಗಿಯ ‘ಬೆಳ್ಳಿ’ ಮಾತು

ಝೀ ವಾಹಿನಿಯ ‘ಯಾರೇ ನೀ ಮೋಹಿನಿ’ ಧಾರಾವಾಹಿಯಲ್ಲಿ ಮುಗ್ಧ ಹಳ್ಳಿಹುಡುಗಿ ‘ಬೆಳ್ಳಿ’ ಪಾತ್ರಕ್ಕೆ ಜೀವ ತುಂಬಿರುವವರು ನಟಿ ಸುಷ್ಮಾ ಶೇಖರ್‌.

ನಾನು ಗಂಡುಬೀರಿ ‘ಗಂಗಾ’

ವೈಯಕ್ತಿಕ ಬದುಕು ಹಾಗೂ ನಟನಾ ಬದುಕು ವಿರುದ್ಧವಾಗಿದ್ದರೂ ಪಾತ್ರಕ್ಕೆ ನ್ಯಾಯ ಒದಗಿಸುತ್ತಿರುವ ದೊಡ್ಡ ಗಂಗಾಳ ಮಾತೃಭಾಷೆ ತೆಲುಗು. ಆದರೂ, ಧಾರಾವಾಹಿಯಲ್ಲಿ ಹವ್ಯಕ ಕನ್ನಡದಲ್ಲಿ ಮಾತನಾಡಲು ಶುರುವಿಟ್ಟರೆ ಸಾಕು ಎಲ್ಲರೂ ಮೂಗಿನ ಮೇಲೆ ಕೈ ಇಡುವುದು ಖಂಡಿತ. ಇವರು ಹುಟ್ಟಿ ಬೆಳೆದದ್ದು ಬೆಂಗಳೂರು.

‘ಕನಕ’ ಚಿತ್ರದ ಹಾಡುಗಳ ಬಿಡುಗಡೆ

ಅದು ‘ಕನಕ’ ಚಿತ್ರದ ಹಾಡುಗಳ ಬಿಡುಗಡೆ ಸಮಾರಂಭ. ಚಿತ್ರರಂಗದ ಹಲವು ಗಣ್ಯರು ಅಲ್ಲಿ ನೆರೆದಿದ್ದರು. ಚಿತ್ರದ ನಿರ್ದೇಶಕ ಆರ್. ಚಂದ್ರು ಅವರ ಮೊಗದಲ್ಲಿ ಚಿತ್ರೀಕರಣ ಪೂರ್ಣಗೊಳಿಸಿದ ಖುಷಿ ಇತ್ತು. ಚಿತ್ರದ ಹಾಡುಗಳನ್ನು ಕೇಳಿದ ಗಣ್ಯರು ಸಂತಸ ಹಂಚಿಕೊಂಡರು.