ಮನೆಯೊಳಗೆ ಹಸಿರ ಸಿರಿ

12 Sep, 2017
ಸ್ಮಿತಾ ಶಿರೂರ

ಇದು ಅಪಾರ್ಟ್‌ಮೆಂಟ್‌ಗಳ ಕಾಲ. ಜಾಗ ಕಡಿಮೆ. ಅದರಲ್ಲೂ ಮಣ್ಣು–ಗಾಳಿ–ಬೆಳಕು ಯಥೇಚ್ಛವಾಗಿ ಸಿಗುವುದು ಅಪರೂಪ. ಹೀಗಾಗಿ ಕೈತೋಟ ಮಾಡಬೇಕೆಂದ ಹಲವರ ಕನಸು ನನಸಾಗುವುದು ಕಷ್ಟ. ಆದರೂ, ಪರಿಸರಪ್ರಿಯರಿಗೆ ಸಸಿ ಬೆಳೆಸುವ ಉತ್ಸಾಹ ಗರಿಗೆದರುವಂತೆ ಮಾಡಿದೆ ‘ಟೆರೇರಿಯಂ’.

ಹಲವರು ಮನೆಯೊಳಗೆ, ಟೆರೇಸ್‌ ಮೇಲೆ ಸಸಿಗಳನ್ನು ಬೆಳೆಸುವುದನ್ನು ಕಂಡಿದ್ದೇವಾದರೂ, ‘ಟೆರೇರಿಯಂ’ ಇದಕ್ಕಿಂತ ಸ್ವಲ್ಪ ಭಿನ್ನ. ಆಲಂಕಾರಿಕ ಮೀನುಗಳನ್ನು ಬೆಳೆಸುವ ‘ಅಕ್ವೇರಿಯಂ’ನಂತೆ ಇದೂ ಆಲಂಕಾರಿಕ ಸಸಿಗಳನ್ನು ಒಡಲಲ್ಲಿಟ್ಟುಕೊಂಡು ಮನೆ ಯನ್ನು ಅಂದಗೊಳಿಸುವ ಹಾಗೂ ಆಹ್ಲಾದಕರ ಶುದ್ಧ ಗಾಳಿಯಾಡುವಂತೆ ಮಾಡುವ ಪುಟ್ಟ ಗಾಜಿನಗೋಳ. ವಿವಿಧ ಆಕಾರದ ಪುಟ್ಟ ಕುಂಡಗಳನ್ನೂ ‘ಟೆರೇರಿಯಂ’ಗಳಂತೆ ಬಳಸಬಹುದು.

ಸುಂದರ ಆಕಾರದ ಗಾಜಿನಗೋಳ, ವಿನ್ಯಾಸಭರಿತ ಪುಟ್ಟ ಕುಂಡಗಳಲ್ಲಿ ಇಂಥ ಸೂಕ್ಷ್ಮಸಸಿಗಳನ್ನು ಬೆಳೆಸುವ ಕೈಂಕರ್ಯದಲ್ಲಿ ಕಳೆದೆರಡು ವರ್ಷಗಳಿಂದ ನಿರತರಾಗಿದ್ದಾರೆ ಮೈಸೂರಿನ ಟೆರೇಷಿಯನ್‌ ಕಾಲೇಜಿನ ಜೈವಿಕ ತಂತ್ರಜ್ಞಾನ ಉಪನ್ಯಾಸಕ ವಿನಯ್‌ ರಾಘವೇಂದ್ರ. ಇವರು ಸಸ್ಯವಿಜ್ಞಾನದಲ್ಲಿ ಬಿಎಸ್‌ಸಿ, ಜೈವಿಕ ತಂತ್ರಜ್ಞಾನದಲ್ಲಿ ಎಂಎಸ್‌ಸಿ, ಪಿ.ಎಚ್.ಡಿ, ಅಂಗಾಂಶ ಕೃಷಿಯಲ್ಲಿ ಪೋಸ್ಟ್‌ ಡಾಕ್ಟೋರಲ್‌ (ಯುನಿವರ್ಸಿಟಿ ಆಫ್‌ ಕ್ಯಾಲಿಫೋರ್ನಿಯಾ) ಪಡೆದಿದ್ದಾರೆ.

ಅಡುಗೆಮನೆ, ಓದುವ ಕೋಣೆ, ಪುಸ್ತಕದ ಕಪಾಟು, ಮಲಗುವ ಕೋಣೆ, ಹಜಾರ... ಹೀಗೆ ಎಲ್ಲೆಂದರಲ್ಲಿ ಇಡಬಹುದಾದ ‘ಟೆರೇರಿಯಂ’ಗಳನ್ನು ಇವರು ವಿನ್ಯಾಸಗೊಳಿಸಿದ್ದಾರೆ. ಕಾಫಿ, ಟೀ ಟ್ರೇಗಳಲ್ಲೂ ಇವುಗಳನ್ನು ಇಡುವ ಟ್ರೆಂಡ್‌ ಈಚೆಗೆ ಬೆಳೆದಿದೆ. ಕಡಿಮೆ ಬೆಳಕಿನಲ್ಲಿ, ಸ್ವಲ್ಪವೇ ನೀರು ಪಡೆದು ಬೆಳೆಯುವ ವಿವಿಧ ಸಸ್ಯಗಳನ್ನು ಗುರುತಿಸಿ ಅವುಗಳನ್ನು ವಿಶಿಷ್ಟ ವಿಧಾನದ ಮೂಲಕ ಬೆಳೆಸಲಾಗುತ್ತದೆ.

ಸ್ವಲ್ಪವೇ ಮಣ್ಣು, ಕಲ್ಲುಗಳನ್ನು ಹಾಕಿ ಚಿಕ್ಕದಾಗಿ ಬೆಳೆಯುವ ಸಸಿಗಳನ್ನು ನೆಡಲಾಗುತ್ತದೆ. ಅವುಗಳಿಗೆ ನಿಗದಿತ ಪ್ರಮಾಣದ ನೀರು ಹಾಕಲಾಗುತ್ತದೆ. ಇವು ‘ಶೋ’ಗಷ್ಟೇ ಅಲ್ಲದೆ ದಿನವಿಡೀ ಆಮ್ಲಜನಕ ಉತ್ಪಾದಿಸುವ ಕಾರ್ಖಾನೆಗಳಂತೆ ಕೆಲಸ ಮಾಡುತ್ತವೆ ಎನ್ನುತ್ತಾರೆ ವಿನಯ್‌. ಸಿಎಫ್‌ಟಿಆರ್ಐ ನಿವೃತ್ತ ವಿಜ್ಞಾನಿ ಡಾ.ಭಾಗ್ಯಲಕ್ಷ್ಮಿ ಅವರ ಸಲಹೆ ಪಡೆದು ‘ಅಂಗಾಂಶ ಕೃಷಿ’ ಪ್ರಯೋಗಾಲಯ ನಡೆಸುತ್ತಿರುವುದು ಇವರ ಈ ಕೌಶಲಕ್ಕೆ ಅಡಿಪಾಯವಾಗಿದೆ.

ಶಂಖ, ಬಾಟಲಿ, ಬಲ್ಬ್‌, ಊಟದ ಡಬ್ಬಿ, ವೈನ್‌ ಗ್ಲಾಸ್‌, ಮಗ್‌, ಫಿಶ್‌ ಬೌಲ್‌ ಆಕಾರಗಳಲ್ಲಿ ಗಾಜಿನ ವಿನ್ಯಾಸಗಳನ್ನು ಮಾಡಿಸಿಕೊಳ್ಳಬೇಕಾಗುತ್ತದೆ. ಅದರಲ್ಲಿ ಸಸ್ಯಗಳನ್ನು ಬೆಳೆಸ ಬಹುದು. ಅದರೊಂದಿಗೆ ವಿವಿಧ ಆಕೃತಿಗಳನ್ನು ಇಟ್ಟು ಒಂದು ಕಾಲ್ಪನಿಕ ದೃಶ್ಯವನ್ನೂ ಸೃಷ್ಟಿಸಬಹುದು.

ಟೆರೇರಿಯಂಗೆ ಮೊದಲು ಸಸ್ಯಗಳ ಆಯ್ಕೆ ಮಹತ್ವದ್ದು. ಪಾಪಾಸುಕಳ್ಳಿ ಜಾತಿಯ ಎಕಿನೋಪ್ಸಿಸ್‌, ಹೆಡ್ಜ್‌ ಹಾಗ್‌, ಪೀನಟ್‌, ಈಸ್ಟರ್‌ ಲಿಲಿ, ಆರ್ಜೆನ್‌ಟೈನ್‌ ಜೇಂಟ್‌, ಸಕ್ಯುಲೆಂಟ್ಸ್‌ ಜಾತಿಯ ಎಚೆವೆರಿಯಾ, ಕ್ರಾಸ್ಸುಲ, ಹವಾರ್ತಿಯಾ, ಯುಫೊರ್ಬಿಯಾ ತಿರುಕಳ್ಳಿ ಮೊದಲಾದವು ಸೂಕ್ತ.

ದೊಡ್ಡ ಗಾತ್ರದ ಬೌಲ್‌ ಇದ್ದರೆ ಪೀಸ್‌ ಲಿಲ್ಲಿ, ಕೆಂಪಂಚಿನ ಡ್ರಾಸಿಯಸ್‌, ಸ್ನೇಕ್ ಪ್ಲಾಂಟ್‌, ಇಂಗ್ಲಿಷ್‌ ಐವಿ, ಬಾರ್ಬೇರ್ಟನ್‌ ಡೈಸಿ, ಲೇಡಿ ಪಾಮ್‌, ಫ್ಲೆಮಿಂಗೋ ಲಿಲ್ಲಿ, ಡೆವಿಲ್ಸ್‌ ಐವಿ, ಚೈನೀಸ್ ಎವರ್‌ಗ್ರೀನ್‌, ಸ್ಪೈಡರ್‌ ಪ್ಲಾಂಟ್‌, ಕಿಂಬರ್ಲಿ ಕ್ವೀನ್‌ ಫರ್ನ್‌ ಮೊದಲಾದ ಸಸ್ಯಗಳನ್ನೂ ಬಳಸಬಹುದು. ಇವು ದಿನದ 24 ಗಂಟೆಯೂ ಆಮ್ಲಜನಕ ಬಿಡುಗಡೆ ಮಾಡುತ್ತವೆ. ಇವನ್ನು ಒಳಾಂಗಣ ಅಲಂಕಾರಕ್ಕೆ ಬಳಸಲಾಗುತ್ತದೆ ಎನ್ನುತ್ತಾರೆ ಅವರು.

ಎ.ಸಿ, ರೆಫ್ರಿಜರೇಟರ್‌ಗಳಿಂದ ಉತ್ಪತ್ತಿಯಾಗುವ ವಿಷಕಾರಿ ಅನಿಲಗಳನ್ನು ಹೀರಿಕೊಳ್ಳುವ ಇಂಥ ಸಸ್ಯಗಳು ಮನೆಯೊಳಗಿನ ಹವೆಯನ್ನು ಶುದ್ಧಗೊಳಿಸುತ್ತವೆ. ಮೊದಲು ಅಮೆರಿಕ, ಯುರೋಪ್‌ ಖಂಡಗಳ ವಿವಿಧ ದೇಶಗಳಲ್ಲಿ ಕಂಡು ಬಂದ ‘ಟೆರೇರಿಯಂ’ ಬಳಕೆ ಈಚೆಗೆ ದೇಶಕ್ಕೂ ಕಾಲಿಟ್ಟಿದೆ.

ವಿದೇಶಕ್ಕೆ ಅಧ್ಯಯನಕ್ಕಾಗಿ ತೆರಳಿದಾಗ ಅಲ್ಲಿ ಇವುಗಳನ್ನು ಕಂಡು ವಿನಯ್‌ ಆಕರ್ಷಿತರಾದರು. ದೇಶಕ್ಕೆ ಮರಳಿದ ನಂತರ ಮೈಸೂರಿನ ‘ಭೂದೇವಿ ಫಾರ್ಮ್‌’ನ ಮಾಲೀಕ ಕೃಷ್ಣರಾಜು ಅವರಿಗೆ ಇಂಥ ಆಲಂಕಾರಿಕ ಸಸ್ಯಗಳನ್ನು ಬೆಳೆಸುವಂತೆ ಸಲಹೆ ನೀಡಿದರು. ಶುಭಸಮಾರಂಭಗಳಲ್ಲಿ ಹೂಗುಚ್ಛಗಳನ್ನು ಕೊಡುವ ಬದಲು ಇಂಥ ಪರೋಪಕಾರಿ ‘ಟೆರೇರಿಯಂ’ಗಳನ್ನು ನೀಡಬಹುದು.

ಇಲ್ಲವೇ ಹಗುರವಾದ ಹೂಕುಂಡಗಳನ್ನೂ ನೀಡಬಹುದು ಎನ್ನುತ್ತಾರೆ ವಿನಯ್‌. ಇವರು ಈಗಾಗಲೇ ‘ಲೇಡಿಸ್‌ ಕ್ಲಬ್‌’ಗಳಿಗೆ, ಮಹಿಳಾ ಸಂಘಗಳಿಗೆ ತರಬೇತಿಯನ್ನೂ ನೀಡಿದ್ದಾರೆ. ಬೆಂಗಳೂರು, ಮೈಸೂರಿನ ಹಲವು ಅಪಾರ್ಟ್‌ಮೆಂಟ್‌ಗಳಿಗೆ ‘ಟೆರೇರಿಯಂ’ಗಳನ್ನು ವಿನ್ಯಾಸಗೊಳಿಸಿಕೊಟ್ಟಿದ್ದಾರೆ. ₹500ರಿಂದ ₹10,000 ಬೆಲೆವರೆಗೂ ಟೆರೇರಿಯಂಗಳನ್ನು ತಯಾರಿಸಬಹುದು.

ಹೊರಗೆ ಹೋಗಿ ಉದ್ಯೋಗ ಮಾಡಲು ಅನುಕೂಲವಿಲ್ಲದ ಮಹಿಳೆಯರು ಇದನ್ನು ತಯಾರಿಸಿ ಆರ್ಥಿಕವಾಗಿ ಬಲಗೊಳ್ಳಬಹುದು ಎನ್ನುತ್ತಾರೆ ವಿನಯ್‌.

ಟೆರೇರಿಯಂ ಸಿದ್ಧಪಡಿಸುವುದು ಹೇಗೆ?
ಸಾಮಾನ್ಯವಾಗಿ ಪಾಪಾಸುಕಳ್ಳಿ ಮತ್ತು ಸಕ್ಯುಲೆಂಟ್ಸ್‌ ಜಾತಿಯ ಗಿಡಗಳನ್ನು ಆಯ್ದುಕೊಳ್ಳಬೇಕು. ಇಷ್ಟವಾದ ಆಕಾರದ ಗಾಜಿನ ಧಾರಕಗಳನ್ನು ಸಿದ್ಧಪಡಿಸಿಕೊಳ್ಳಬೇಕು. ಗಾಜಿನ ಬೌಲ್‌ ಅನ್ನು ಚೆನ್ನಾಗಿ ತೊಳೆದು, ಅದರಲ್ಲಿ ಸ್ವಲ್ಪ ಬೆಣಚುಕಲ್ಲು ಅಥವಾ ಜಲ್ಲಿಕಲ್ಲುಗಳನ್ನು ಹಾಕಬೇಕು. ನಂತರ ಇದ್ದಿಲನ್ನು ಹಾಕಬೇಕು. ಇದ್ದಿಲು ಗಿಡಗಳಿಗೆ ಬೇಕಾದ ಪೋಷಕಾಂಶಗಳನ್ನು ಒದಗಿಸಿ ಬೇರು ಸದೃಢವಾಗಿ ಬೆಳೆಯಲು ಸಹಕಾರಿಯಾಗುತ್ತದೆ.

ಇದರ ಪದರದ ಮೇಲೆ ಕಾಲು ಭಾಗದಷ್ಟು ಕೋಕೊಪಿಟ್‌ ಸೇರಿಸಬೇಕು. ಇದನ್ನು ಸೇರಿಸುವುದರಿಂದ ಗಿಡಗಳಿಗೆ ಬೇಕಾದಷ್ಟೇ ನೀರು ಹಾಗೂ ಪೋಷಕಾಂಶಗಳು ದೊರೆಯುತ್ತವೆ. ಆಯ್ಕೆಯಾದ ಗಿಡಗಳನ್ನು ಎಚ್ಚರಿಕೆಯಿಂದ ನೆಡಬೇಕು. ನಂತರ ಕೋಕೊಪಿಟ್‌ ಪದರದ ಮೇಲೆ ವಿವಿಧ ಬಣ್ಣಗಳಿಂದ ತಯಾರಿಸಲಾದ ಮರಳನ್ನು ಆಲಂಕಾರಿಕವಾಗಿ ಹಾಕಿ, ಬೆಣಚುಕಲ್ಲುಗಳನ್ನು ಹರಡಬೇಕು. ನಡುವೆ ವಿವಿಧ ಸಣ್ಣ ಮೂರ್ತಿಗಳು, ಆಕೃತಿಗಳನ್ನು ಇಡಬಹುದು.

ಬ್ರಿಟನ್ನಿನ ಸಸ್ಯವಿಜ್ಞಾನಿ ನಥಾನಿಯಲ್‌ ಬಾಗ್‌ಶಾ ವಾರ್ಡ್‌ ಅವರು 1842ರಲ್ಲಿ ‘ಟೆರೇರಿಯಂ’ ಅನ್ನು ಕಂಡುಹಿಡಿದರು. ಅವರು ಸಂಶೋಧನೆ ಮಾಡುತ್ತಿರುವಾಗ ಆಕಸ್ಮಿಕವಾಗಿ ಗಾಜಿನ ಜಾರ್‌ ಒಂದರಲ್ಲಿ ಉಳಿದಿದ್ದ ಬೀಜವೊಂದು ಮೊಳಕೆಯೊಡೆದು ಸಸಿಯಾಗಿದ್ದನ್ನು ಕಂಡರು. ಇದರ ಆಧಾರದ ಮೇಲೆ ಅವರೇ ವ್ಯವಸ್ಥಿತವಾಗಿ ರೂಪಿಸಿದ ‘ವಾರ್ಡಿಯನ್‌ ಕೇಸ್‌’ ಮುಂದೆ ಟೆರೇರಿಯಂ ಎಂದು ಖ್ಯಾತವಾಯಿತು.

Read More

Comments
ಮುಖಪುಟ

ಕಾವೇರಿ: ಮರು ಪರಿಶೀಲನೆ ಅರ್ಜಿ ಸಲ್ಲಿಸಲು ಸಲಹೆ

ಜಲಸಂಪನ್ಮೂಲ ತಾಂತ್ರಿಕ ತಜ್ಞ ವಲಯ ನೀಡಿರುವ ಈ ಸಲಹೆಯನ್ನು ವಿಧಾನಸಭೆಯ ಚುನಾವಣೆಯ ಹೊಸ್ತಿಲಲ್ಲಿರುವ ಈ ಹಂತದಲ್ಲಿ ರಾಜ್ಯ ಸರ್ಕಾರ ಪುರಸ್ಕರಿಸುವುದೇ ಎಂಬುದನ್ನು ಕಾದು ನೋಡಬೇಕಿದೆ.

ಪ್ರಭುತ್ವದ ಕ್ರೌರ್ಯ ಬಿಚ್ಚಿಟ್ಟ ಹೋರಾಟಗಾರರು!

ಪಾಕಿಸ್ತಾನದ ಲೇಖಕಿ ಮತ್ತು ಮಾಜಿ ಸಂಸದೆ ಫರ್ಹಾನಾಜ್‌ ಇಸ್ಫಹಾನಿ, ಮಾಲ್ಡೀವ್ಸ್‌ ಮಾಜಿ ಅಧ್ಯಕ್ಷ ಮೊಹಮದ್ ನಶಿದ್‌ ಹಾಗೂ ಶ್ರೀಲಂಕಾದ ಮಾನವ ಹಕ್ಕು ಹೋರಾಟಗಾರ ಎಸ್‌.ಸಿ. ಚಂದ್ರಹಾಸನ್‌ ತಾವು ಅನುಭವಿಸಿದ, ಅನುಭವಿಸುತ್ತಿರುವ ಕಷ್ಟಕಾರ್ಪಣ್ಯಗಳನ್ನು ಶನಿವಾರ ಬೆಂಗಳೂರಿನಲ್ಲಿ ಹಂಚಿಕೊಂಡರು.

ಭಕ್ತಿಯ ಅಭಿಷೇಕದಲ್ಲಿ ಮಿಂದೆದ್ದ ಗೊಮ್ಮಟೇಶ್ವರ

ವಿರಾಗದ ಮೇರುಮೂರ್ತಿಗೆ ಅಭಿಷೇಕ ಪ್ರಾರಂಭವಾದುದು ಮಧ್ಯಾಹ್ನ 2.30ರ ವೇಳೆಗೆ. ಬೆಳಗಿನ ತಂಪು ಹೊತ್ತಿನಿಂದಲೇ ಜನ ಗೊಮ್ಮಟನ ಸನ್ನಿಧಿಯಲ್ಲಿ ಸೇರತೊಡಗಿದ್ದರು. ಮಧ್ಯಾಹ್ನ ಹನ್ನೆರಡರ ವೇಳೆಗೆ ನೆತ್ತಿಯ ಮೇಲಿನ ಸೂರ್ಯ ಕೆಂಡ ಚೆಲ್ಲುತ್ತಿದ್ದ. ಗೊಮ್ಮಟನ ಅಭಿಷೇಕಕ್ಕೆ ಕಾತರದ ಕಂಗಳಲ್ಲಿ ಸೇರಿದ ಆರು ಸಾವಿರಕ್ಕೂ ಹೆಚ್ಚಿನ ಜನಸ್ತೋಮ ಬೆವರಿನ ಅಭಿಷೇಕದಲ್ಲಿ ಸ್ವಯಂ ತೋಯತೊಡಗಿತು.

ಮೂವರು ಸಿಬಿಐ ಬಲೆಗೆ

ನೀರವ್ ಮೋದಿ ಕಂಪನಿಯ ವಹಿವಾಟು ಜವಾಬ್ದಾರಿ ಹೊತ್ತಿದ್ದ ಹೇಮಂತ್ ಭಟ್, ಪಂಜಾಬ್ ನ್ಯಾಷನಲ್ ಬ್ಯಾಂಕ್‌ನ(ಪಿಎನ್‌ಬಿ) ನಿವೃತ್ತ ಉಪ ವ್ಯವಸ್ಥಾಪಕ ಗೋಕುಲನಾಥ್ ಶೆಟ್ಟಿ ಮತ್ತು ಪಿನ್‌ಬಿಯ ಮತ್ತೊಬ್ಬ ಅಧಿಕಾರಿ ಮನೋಜ್ ಕಾರಟ್ ಎಂಬುವವರನ್ನು ಸಿಬಿಐ ಅಧಿಕಾರಿಗಳು ಬಂಧಿಸಿದ್ದಾರೆ.

ಸಂಗತ

ಮಾಲ್ಡೀವ್ಸ್‌ನ ರಾಜಕೀಯ ಬಿಕ್ಕಟ್ಟು–ಪರಿಹಾರ

ಭಾರತಕ್ಕೆ ಉಳಿದಿರುವ ದಾರಿಯೆಂದರೆ, ವಿಶ್ವಸಂಸ್ಥೆ ಮತ್ತು ಅಮೆರಿಕದ ಜೊತೆಗೂಡಿ ರಾಜತಾಂತ್ರಿಕ ಮಾರ್ಗದ ಮೂಲಕ ಮಾಲ್ಡೀವ್ಸ್‌ ಬಿಕ್ಕಟ್ಟನ್ನು ಪರಿಹರಿಸಲು ಶ್ರಮಿಸುವುದು.

ಅಂಗೈ ಹುಣ್ಣಿಗೆ ಕನ್ನಡಿ ಬೇಕೇ?

ಭ್ರಮಾಧೀನ ಮನಸ್ಥಿತಿಯಲ್ಲಿ ಬದುಕುತ್ತಿರುವ ಸಮುದಾಯವನ್ನು ಎಚ್ಚರಿಸಿ ಮುನ್ನಡೆಸಬೇಕಾದ ಜವಾಬ್ದಾರಿ ಸಮಾಜಕ್ಕಿದೆಯಲ್ಲವೇ?

ನಿರುದ್ಯೋಗ ವ್ಯಕ್ತಿಗತ ಸಮಸ್ಯೆಯೇ?

ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಅರ್ಹತೆಯುಳ್ಳವರಷ್ಟೇ ಅಸ್ತಿತ್ವ ಉಳಿಸಿಕೊಳ್ಳಲು ಸಾಧ್ಯ ಎಂಬ ನಿಲುವು ತಳೆಯುವುದು ಆಷಾಡಭೂತಿತನವಾಗುತ್ತದೆ

ಜಾತಿ ಮತ್ತು ಹಿಂಸಾಚಾರದ ಸಮೀಕರಣ

ಒಂದು ವರ್ಗದ ನೀಚ ಕೃತ್ಯಗಳಿಗೆ ಮತ್ತೊಂದು ವರ್ಗವನ್ನು ಹೊಣೆಯಾಗಿಸುವ ಕೆಸರೆರಚಾಟ ಮುಂದುವರಿಯುತ್ತಿರುವವರೆಗೂ ಅಲ್ಲಿ ಅಸಹಿಷ್ಣುತೆ, ಹಿಂಸೆ ತಡೆಯುವುದು ಕಷ್ಟ.

ಮುಕ್ತಛಂದ

ಅಪ್ಪನ ನೆನಪುಗಳು

ಅಡಿಗರ ವ್ಯಕ್ತಿತ್ವ ಹಾಗೂ ಸಾಹಿತ್ಯಿಕ ಸಾಧನೆಯನ್ನು ಅವರ ನಿಕಟವರ್ತಿಗಳು ಹಾಗೂ ವಿಮರ್ಶಕರು ಸಾಕಷ್ಟು ದಾಖಲಿಸಿದ್ದಾರೆ. ಕೌಟುಂಬಿಕ ವ್ಯಕ್ತಿಯಾಗಿ ಅಡಿಗರು ಹೇಗಿದ್ದರು? ಅವರ ಪುತ್ರ ಪ್ರದ್ಯುಮ್ನ ಗೋಪಾಲಕೃಷ್ಣ ಅಡಿಗ ಅವರ ನೆನಪುಗಳು ಇಲ್ಲಿವೆ.

ಸ್ವಾಭಿಮಾನ ಮತ್ತು ಸಮಗ್ರ ಕಾವ್ಯ!

‘ಪ್ರಾರ್ಥನೆ’ ಕವಿತೆಯ ವಿವಾದದ ಸಂದರ್ಭದಲ್ಲಿ ಅಂದಿನ ಮುಖ್ಯಮಂತ್ರಿ ನಿಜಲಿಂಗಪ್ಪನವರ ಪತ್ರಕ್ಕೆ ಅಡಿಗರು ಬರೆದ ಜವಾಬು ಕವಿಗೆ ಇರಬೇಕಾದ ಸ್ವಾಭಿಮಾನವನ್ನು ಸೂಚಿಸುವಂತಿದೆ. ಸ್ವಾಭಿಮಾನ ಎನ್ನುವುದು ಸೋವಿಯಾಗಿರುವ ಇಂದಿನ ಸಂದರ್ಭದಲ್ಲಿ ಅಡಿಗರ ನಿಲುವು ಹೆಚ್ಚು ಮಹತ್ವದ್ದಾಗಿ ಕಾಣುತ್ತದೆ.

ಕನ್ನಡ ಸಾಹಿತ್ಯಲೋಕದ ವಿಷಕಂಠ

ಎಲಿಯಟ್‌ ಕೂಡ ಒಂದು ಕವನದಲ್ಲಿ ಇಷ್ಟೆಲ್ಲ ಹೇಳಲಿಲ್ಲವಲ್ಲ! ಇದು ಅಡಿಗರ ‘ಭೂಮಿಗೀತ’, ‘ಭೂತ’ ಕವಿತೆಗಳಿಗೆ ಅಮೆರಿಕದ ಕವಿಯೊಬ್ಬರ ಉದ್ಗಾರ. ಆದರೆ, ಅತ್ಯುತ್ತಮ ಕಾವ್ಯ ರಚಿಸಿಯೂ ನಿರಂತರವಾಗಿ ಟೀಕೆಗೆ, ಪ್ರತಿರೋಧಕ್ಕೆ, ಖಂಡನೆಗೆ ಗುರಿಯಾದ ಅಡಿಗರಂಥ ಕವಿ ಇನ್ನೊಬ್ಬರಿಲ್ಲ.

‘ಚಂಡೆ ಮದ್ದಳೆ’ ಕವಿಯ ನಿರಂತರ ‘ವೇಸ್ಟ್ ಲ್ಯಾಂಡ್’

ಎಲಿಯಟ್ ಇಂಗ್ಲಿಷ್‌ನಲ್ಲಿ ಮಾಡಿದುದನ್ನು ಅಡಿಗರು ಕನ್ನಡದಲ್ಲಿ ಮಾಡಿದರು. ತಟಸ್ಥವಾಗಿದ್ದ ಸಾಹಿತ್ಯದಲ್ಲಿ ವಿದ್ಯುತ್ ಸಂಚಲನ ಉಂಟು ಮಾಡಿದರು. ಅಡಿಗರ ನಂತರ ಕನ್ನಡ ಕಾವ್ಯ ಮೊದಲಿನ ಹಾಗೆ ಇರಲಿಲ್ಲ. ಇದುವರೆಗೆ ಕನ್ನಡದಲ್ಲಿ ಇಲ್ಲದ್ದನ್ನು ಅವರು ಸೃಷ್ಟಿಸಿದರು. ಅವರನ್ನು ವಿರೋಧಿಸಿದವರು ಕೂಡ ಅವರ ನುಡಿಗಟ್ಟನ್ನು ಸ್ಪರ್ಶಿಸಿಯೇ ಹಾಗೆ ಮಾಡಬೇಕಾಯಿತು. ಇದಕ್ಕಿಂತಲೂ ಹೆಚ್ಚಿನ ಕೊಡುಗೆಯೊಂದಿದೆಯೇ?