ಜ್ಯೋತಿಷಿ ಮಾತು ನಂಬಿ ಸಾವಿರ ಮಾನಿಟರ್ ಕದ್ದ!

  • ಜ್ಯೋತಿಷಿ ಕೃಷ್ಣರಾಜು ಅಲಿಯಾಸ್ ಸ್ವಾಮಿ

12 Oct, 2017
ಪ್ರಜಾವಾಣಿ ವಾರ್ತೆ

ಬೆಂಗಳೂರು: ಜ್ಯೋತಿಷಿಯ ಮಾತು ಕೇಳಿ ತಾನು ಕೆಲಸ ಮಾಡುತ್ತಿದ್ದ ಕಂಪೆನಿಯ 1,000 ಮಾನಿಟರ್‌ಗಳನ್ನು ಬೇರೆಯವರಿಗೆ ಮಾರಿದ್ದ ದಾಮೋದರ್ (42) ಎಂಬಾತ ಈಗ ಸಿದ್ಧಾಪುರ ಪೊಲೀಸರಿಗೆ ಸಿಕ್ಕಿಬಿದ್ದು ಪರಪ್ಪನ ಅಗ್ರಹಾರ ಕಾರಾಗೃಹದ ಅತಿಥಿಯಾಗಿದ್ದಾನೆ.

ದಾಮೋದರ್ ಮಾತ್ರವಲ್ಲದೆ, ಕಂಪೆನಿಗೆ ವಂಚಿಸುವಂತೆ ಆತನಿಗೆ ಪ್ರಚೋದನೆ ನೀಡಿದ್ದ ಜ್ಯೋತಿಷಿ ಕೃಷ್ಣರಾಜು ಅಲಿಯಾಸ್ ಸ್ವಾಮಿ (58), ಕೃತ್ಯಕ್ಕೆ ನೆರವಾಗಿದ್ದ ಜಯನಗರದ ಸರವಣ (40), ಶ್ರೀನಿವಾಸ್ ಅಲಿಯಾಸ್ ಸೀನು (34) ಹಾಗೂ ಸಿದ್ಧಾಪುರದ ರಾಮ್‌ದಾಸ್ (38) ಕೂಡ ಕಂಬಿ ಎಣಿಸುತ್ತಿದ್ದಾರೆ.

ಸುಧಾಮನಗರ ನಿವಾಸಿಯಾದ ದಾಮೋದರ್, ಹೊಸೂರು ರಸ್ತೆಯಲ್ಲಿರುವ ‘ಸೂಪರ್‌ಟ್ರಾನ್‌ ಎಲೆಕ್ಟ್ರಾನಿಕ್ಸ್‌’ ಕಂಪೆನಿಯಲ್ಲಿ ಏಳು ವರ್ಷಗಳಿಂದ ಮೇಲ್ವಿಚಾರಕನಾಗಿ ಕೆಲಸ ಮಾಡುತ್ತಿದ್ದ. ಅದು ‘ಡೆಲ್‌’ ಕಂಪೆನಿಯ ಮಾನಿಟರ್‌ಗಳನ್ನು ಅಧಿಕೃತವಾಗಿ ಮಾರಾಟ ಮಾಡುತ್ತಿರುವ ಕಂಪೆನಿ.

‘ಕಂಪೆನಿಯ ಬೇಡಿಕೆ ಮೇರೆಗೆ ತಮಿಳುನಾಡಿನ ಪೆರಂಬದೂರಿನಿಂದ ಆ.3 ಹಾಗೂ ಆ.11ರಂದು ಸಾವಿರ ಮಾನಿಟರ್‌ಗಳನ್ನು ‘ಬ್ಲೂ ಡಾರ್ಟ್‌’ ಕೊರಿಯರ್ ಕಂಪೆನಿಯ ವಾಹನದಲ್ಲಿ ಕಳುಹಿಸಲಾಗಿತ್ತು. ಆ ಮಾನಿಟರ್‌ಗಳನ್ನು ಗೆಳೆಯನ ಮನೆಗೆ ಡೆಲಿವರಿ ಮಾಡಿಸಿದ್ದ ದಾಮೋದರ್, ನಂತರ ಸಹಚರರ ಮೂಲಕ ಎಸ್‌.ಪಿ. ರಸ್ತೆಯ ಅಂಗಡಿಗಳಲ್ಲಿ ಅವುಗಳನ್ನು ಮಾರಾಟ ಮಾಡಿಸಿದ್ದ’ ಎಂದು ತನಿಖಾಧಿಕಾರಿಗಳು ಹೇಳಿದರು.

ಮಾನಿಟರ್‌ಗಳನ್ನು ಕಳುಹಿಸಿದ ಕೆಲ ದಿನಗಳ ನಂತರ ಡೆಲ್‌ ಕಂಪೆನಿಯು ಬಿಲ್ ಪಾವತಿಸುವಂತೆ ಇ–ಮೇಲ್ ಮೂಲಕ ‘ಸೂಪರ್‌ಟ್ರಾನ್‌ ಎಲೆಕ್ಟ್ರಾನಿಕ್ಸ್‌’ ಆಡಳಿತ ಮಂಡಳಿಯನ್ನು ಕೋರಿತ್ತು. ಅದಕ್ಕೆ, ‘ಮಾನಿಟರ್‌ಗಳೇ ಬಂದಿಲ್ಲ. ಬಿಲ್ ಹೇಗೆ ಕಟ್ಟುವುದು’ ಎಂದು ಆಡಳಿತ ಮಂಡಳಿ ಪ್ರತಿಕ್ರಿಯಿಸಿತ್ತು.

ಇದರಿಂದ ಗಾಬರಿಗೊಂಡ ಡೆಲ್ ಕಂಪೆನಿ ಸಿಬ್ಬಂದಿ, ‘ಬ್ಲೂ ಡಾರ್ಟ್‌’ ಮೂಲಕ ಮಾನಿಟರ್‌ಗಳನ್ನು ಕಳುಹಿಸಿರುವ ಹಾಗೂ ಸರಕನ್ನು ಸ್ವೀಕರಿಸಿರುವುದಾಗಿ ತಮ್ಮ ಸಿಬ್ಬಂದಿಯೇ ಸಹಿ ಮಾಡಿರುವ ವಿಚಾರವನ್ನು ತಿಳಿಸಿದ್ದರು. ಆ ನಂತರ ಆಡಳಿತ ಮಂಡಳಿಯವರು ಸಿದ್ಧಾಪುರ ಠಾಣೆಗೆ ದೂರು ಕೊಟ್ಟಿದ್ದರು.

‘ಕಂಪೆನಿಯ ಎಲ್ಲ ನೌಕರರನ್ನೂ ವಿಚಾರಣೆಗೆ ಒಳಪಡಿಸಿದೆವು. ದಾಮೋದರ್ ತೊದಲಿಕೆ ಉತ್ತರಗಳನ್ನು ನೀಡುತ್ತಿದ್ದ. ಆತನ ಹೇಳಿಕೆಯಲ್ಲೂ ಸಾಕಷ್ಟು ಗೊಂದಲಗಳಿದ್ದವು. ಅಲ್ಲದೆ, ಸರಕನ್ನು ಸ್ವೀಕರಿಸಿರುವುದಾಗಿ ಆತನೇ ಬೇರೊಬ್ಬರ ಹೆಸರಿನಲ್ಲಿ ಸಹಿ ಮಾಡಿದ್ದ. ಬರವಣಿಗೆ ಶೈಲಿ ಗಮನಿಸಿದಾಗ ಅದು ಖಾತ್ರಿಯಾಯಿತು. ವಶಕ್ಕೆ ಪಡೆದು ಹೆಚ್ಚಿನ ವಿಚಾರಣೆಗೆ ಒಳಪಡಿಸಿದಾಗ ತಪ್ಪೊಪ್ಪಿಕೊಂಡ’ ಎಂದು ತನಿಖಾಧಿಕಾರಿಗಳು ಹೇಳಿದರು.

‘ಆತ ನೀಡಿದ ಮಾಹಿತಿ ಆಧರಿಸಿ ಉಳಿದವರನ್ನೂ ಬಂಧಿಸಲಾಯಿತು. ಸದ್ಯ 671 ಮಾನಿಟರ್‌ಗಳು ಹಾಗೂ ₹ 10.50 ಲಕ್ಷ ನಗದನ್ನು ಜಪ್ತಿ ಮಾಡಿದ್ದೇವೆ’ ಎಂದು ಮಾಹಿತಿ ನೀಡಿದರು.

ಭವಿಷ್ಯ ಹಾಳು ಮಾಡಿದ ಜ್ಯೋತಿಷಿ: ‘ಏಳು ವರ್ಷಗಳಿಂದ ಪ್ರಾಮಾಣಿಕತೆಯಿಂದ ದುಡಿದಿದ್ದೆ. ಕಂಪೆನಿಯ ಸಂಬಳವನ್ನೇ ನಂಬಿ ಬದುಕುತ್ತಿದ್ದೆ. ಈ ನಡುವೆ ಆರ್ಥಿಕ ಸಂಕಷ್ಟ ಎದುರಾಯಿತು. ಸಾಲದ ಸುಳಿಯಲ್ಲಿ ಸಿಲುಕಿದ ನಾನು, ಹೇಗಾದರೂ ಮಾಡಿ ಸಂಕಷ್ಟದಿಂದ ಹೊರಬರಬೇಕು ಎಂದು ನಿರ್ಧರಿಸಿದೆ’ ಎಂದು ದಾಮೋದರ್ ಪೊಲೀಸರಿಗೆ ಹೇಳಿಕೆ ಕೊಟ್ಟಿದ್ದಾನೆ.

‘ಮಲ್ಲಿಗೆ ಆಸ್ಪತ್ರೆ ಸಮೀಪದ ಅಶ್ವತ್ಥಕಟ್ಟೆಯ ಬಳಿ ಕೃಷ್ಣರಾಜು ಎಂಬುವರು ಭವಿಷ್ಯ ಹೇಳುತ್ತಾರೆ, ಅವರನ್ನು ಸಂಪರ್ಕಿಸಿದರೆ ಕಷ್ಟಗಳು ನಿವಾರಣೆಯಾಗುತ್ತವೆ ಎಂದು ಪರಿಚಿತರು ಹೇಳಿದ್ದರು. ಅಂತೆಯೇ ಅವರನ್ನು ಸಂಪರ್ಕಿಸಿ ಸಮಸ್ಯೆಗಳನ್ನು ಹೇಳಿಕೊಂಡೆ. ಕೆಲಸ ಮಾಡುತ್ತಿರುವ ಕಂಪೆನಿಯ ಬಗ್ಗೆಯೂ ತಿಳಿಸಿದ್ದೆ. ಆಗ ಅವರು, ‘ಆಷಾಢ ಕಳೆದ ಮೇಲೆ ಶ್ರಾವಣದಲ್ಲಿ ನಿನಗೆ ಒಳ್ಳೆ ಭವಿಷ್ಯ ಬರುತ್ತದೆ. ನಾನು ಹೇಳಿದ ಹಾಗೆ ಮಾಡಿದರೆ ನೆಮ್ಮದಿಯಾಗಿ ಬದುಕಬಹುದು’ ಎಂದು ಹೇಳಿ ಮಂತ್ರಿಸಿದ ನಿಂಬೆ ಹಣ್ಣನ್ನು ಕೊಟ್ಟು ಕಳುಹಿಸಿದ್ದರು.’

‘ಅವರ ಸೂಚನೆಯಂತೆ ಮೂರು ದಿನಗಳ ಬಳಿಕ ಪುನಃ ಭೇಟಿಯಾದೆ. ಆಗ ಅವರು, ‘ನೀನು ಕೆಲಸ ಮಾಡುವ ಕಂಪೆನಿಗೆ ಬರುವ ಮಾನಿಟರ್‌ಗಳನ್ನು ಬೇರೆಯವರಿಗೆ ಮಾರಾಟ ಮಾಡು. ತಪ್ಪು ಲೆಕ್ಕ ತೋರಿಸಿ ಆಡಳಿತ ಮಂಡಳಿಗೆ ವಂಚನೆ ಮಾಡು. ಇದು ಯಾರಿಗೂ ಗೊತ್ತಾಗುವುದಿಲ್ಲ. ನೀನು ಶ್ರೀಮಂತನಾಗಲು ಇರುವುದು ಇದೊಂದೇ ದಾರಿ. ಭವಿಷ್ಯವಾಣಿಯೂ ಇದನ್ನೇ ನುಡಿಯುತ್ತಿದೆ’ ಎಂದು ಹೇಳಿದರು.

‘ನಂತರ ನನ್ನ ಬಾಮೈದ ರಾಮ್‌ದಾಸ್, ಸ್ನೇಹಿತ ರಾಜೇಂದ್ರ, ಬ್ಲೂ ಡಾರ್ಟ್‌ ಕಂಪೆನಿಗೆ ತಮ್ಮ ವಾಹನಗಳನ್ನು ಬಾಡಿಗೆಗೆ ಬಿಟ್ಟಿದ್ದ ಸರವಣ ಹಾಗೂ ಸೀನು ಅವರನ್ನೂ ಜ್ಯೋತಿಷಿ ಬಳಿ ಕರೆದುಕೊಂಡು ಹೋದೆ. ದಾಮೋದರ್‌ಗೆ ನೆರವಾಗುವಂತೆ ಅವರಿಗೂ ಮರುಳು ಮಾಡಿದ ಜ್ಯೋತಿಷಿ, ‘ಮಾನಿಟರ್‌ಗಳನ್ನು ಮಾರಾಟ ಮಾಡಿದ ಬಳಿಕ ನನಗೂ ಅದರಲ್ಲಿ ಪಾಲು ಕೊಡಿ’ ಎಂದು ಹೇಳಿದ್ದರು.

‘ಆ.3 ಹಾಗೂ ಆ.11ರಂದು ಪೆರಂಬದೂರಿನಿಂದ ಬಂದ ಮಾನಿಟರ್‌ಗಳನ್ನು ರಾಜೇಂದ್ರನ ಮನೆಯಲ್ಲಿ ಇಳಿಸಿದೆವು. ಅಲ್ಲದೆ, ಮಾನಿಟರ್‌ಗಳು ಡೆಲಿವರಿ ಆಗಿರುವುದಾಗಿ ಸಹಿ ಮಾಡಿ ಬ್ಲೂ ಡಾರ್ಟ್‌ಗೆ ವೋಚರ್ ಕಳುಹಿಸಿದ್ದೆವು’ ಎಂದು ದಾಮೋದರ್ ಹೇಳಿಕೆ ಕೊಟ್ಟಿರುವುದಾಗಿ ಅಧಿಕಾರಿಯೊಬ್ಬರು ತಿಳಿಸಿದರು.

‘ಇಷ್ಟೊಂದು ಕದಿಯುತ್ತಾರೆಂದು ಗೊತ್ತಿರಲಿಲ್ಲ’
‘ಸಾಲದ ಸುಳಿಯಲ್ಲಿ ಸಿಲುಕಿರುವುದಾಗಿ ದಾಮೋದರ್ ಹೇಳಿದ್ದರಿಂದ ಕಂಪೆನಿಯ ನಾಲ್ಕೈದು ಮಾನಿಟರ್‌ಗಳನ್ನು ಮಾರಾಟ ಮಾಡಿ, ಸಾಲ ತೀರಿಸಿಕೊಳ್ಳುವಂತೆ ತಮಾಷೆಗೆ ಹೇಳಿದ್ದೆ. ಆದರೆ, ಅವರು ಸಾವಿರ ಮಾನಿಟರ್‌ಗಳನ್ನು ಕಳ್ಳತನ ಮಾಡುತ್ತಾರೆಂಬುದು ನನಗೆ ಗೊತ್ತಿರಲಿಲ್ಲ’ ಎಂದು ಜ್ಯೋತಿಷಿ ಹೇಳಿಕೆ ಕೊಟ್ಟಿದ್ದಾಗಿ ಅಧಿಕಾರಿಗಳು ತಿಳಿಸಿದರು.

ಜಿಎಸ್‌ಟಿ ನೆಪದಲ್ಲಿ ಮಾರಾಟ
ಕಂಪ್ಯೂಟರ್ ಹಾಗೂ ಮಾನಿಟರ್ ವ್ಯಾಪಾರಿ ಅರವಿಂದ್ ಎಂಬುವರನ್ನು ಸಂಪರ್ಕಿಸಿದ ಆರೋಪಿಗಳು, ‘ಜಿಎಸ್‌ಟಿ ಸಮಸ್ಯೆಯಿಂದ ಈ ಮಾನಿಟರ್‌ಗಳು ಗೋದಾಮಿನಲ್ಲೇ ಉಳಿದಿದ್ದವು. ಈಗ ಕಡಿಮೆ ಬೆಲೆಗೆ ಮಾರಾಟ ಮಾಡಲು ತೀರ್ಮಾನಿಸಿದ್ದೇವೆ’ ಎಂದು ಹೇಳಿದ್ದರು. ಅದನ್ನು ನಂಬಿದ ಅರವಿಂದ್ ಅವರು ನಗರದ ಎಸ್‌.ಪಿ. ರಸ್ತೆಯಲ್ಲಿರುವ 15 ಅಂಗಡಿಗಳಿಗೆ ಅವುಗಳನ್ನು ಮಾರಾಟ ಮಾಡಿಸಿದ್ದರು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ

Read More

Comments
ಮುಖಪುಟ

ರೈತ ನಾಯಕ, ಶಾಸಕ ಪುಟ್ಟಣ್ಣಯ್ಯ ವಿಧಿವಶ

ಮೇಲುಕೋಟೆ ವಿಧಾನಸಭಾ ಕ್ಷೇತ್ರದ ಶಾಸಕ ಕೆ.ಎಸ್‌.ಪುಟ್ಟಣ್ಣಯ್ಯ (69) ಭಾನುವಾರ ರಾತ್ರಿ 10.45ಕ್ಕೆ ಹೃದಯಾಘಾತದಿಂದ ಇಲ್ಲಿ ನಿಧನರಾದರು.

ಪಿಎನ್‌ಬಿ ವಂಚನೆ ಹಗರಣ: ಮತ್ತಷ್ಟು ಸುಳಿವು ಬಯಲು

ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ಗೆ (ಪಿಎನ್‌ಬಿ) ವಜ್ರಾಭರಣ ಉದ್ಯಮಿ ನೀರವ್‌ ಮೋದಿ ಅವರು ₹11,400 ಕೋಟಿ ವಂಚನೆ ಮಾಡಿದ ಪ್ರಕರಣದ ತನಿಖೆ ತೀವ್ರಗೊಂಡಿದೆ.

ಶ್ರವಣಬೆಳಗೊಳ: ಬೆಟ್ಟದಿಂದ ಬೆಟ್ಟಕ್ಕೆ ಭಕ್ತಿಸೇತು

ವಿಂಧ್ಯಗಿರಿಯ ಬೆಟ್ಟದ ಮೇಲೆ ಬಾಹುಬಲಿಯ ಮಹಾಮಸ್ತಕಾಭಿಷೇಕ ನಡೆಯುತ್ತಿದ್ದರೆ, ಅದರ ಸಂಭ್ರಮದ ಅಲೆಯೊಂದು ಚಂದ್ರಗಿರಿಯ ನೆತ್ತಿಯ ಮೇಲೆ ಅನುರಣಗೊಳ್ಳುತ್ತಿತ್ತು.

ಯುವಕನ ಮೇಲೆ ಶಾಸಕ ಹ್ಯಾರಿಸ್ ಪುತ್ರನ ದಬ್ಬಾಳಿಕೆ

ಊಟ ಮಾಡುತ್ತಿದ್ದ ವೇಳೆ ಕಾಲು ತಗುಲಿತು ಎಂಬ ಕಾರಣಕ್ಕೆ ಕಾಂಗ್ರೆಸ್ ಶಾಸಕ ಎನ್‌.ಎ.ಹ್ಯಾರಿಸ್ ಪುತ್ರ ಮೊಹಮದ್ ನಲಪಾಡ್‌ (24) ಮತ್ತು ಅವರ ಸ್ನೇಹಿತರು ಯುವಕನೊಬ್ಬನ ಮೇಲೆ ಮನಸೋ ಇಚ್ಛೆ ಹಲ್ಲೆ ಮಾಡಿದ್ದಾರೆ.

ಸಂಗತ

ಅರಣ್ಯ ಪರಿಸ್ಥಿತಿ ವರದಿ ಮತ್ತು ನೈಜ ಸ್ಥಿತಿ

ಅರಣ್ಯ ಪ್ರದೇಶ ಹೆಚ್ಚಳದ ಹಿಂದಿನ ಹಾಗೂ ಸಮಾಜೋ-–ಆರ್ಥಿಕ ಆಯಾಮಗಳು ಮತ್ತು ಇಲಾಖೆಯ ಆಡಳಿತಾತ್ಮಕ ಜವಾಬ್ದಾರಿಯನ್ನು ವರದಿ ಚರ್ಚಿಸುವುದಿಲ್ಲ

ಮಾಲ್ಡೀವ್ಸ್‌ನ ರಾಜಕೀಯ ಬಿಕ್ಕಟ್ಟು–ಪರಿಹಾರ

ಭಾರತಕ್ಕೆ ಉಳಿದಿರುವ ದಾರಿಯೆಂದರೆ, ವಿಶ್ವಸಂಸ್ಥೆ ಮತ್ತು ಅಮೆರಿಕದ ಜೊತೆಗೂಡಿ ರಾಜತಾಂತ್ರಿಕ ಮಾರ್ಗದ ಮೂಲಕ ಮಾಲ್ಡೀವ್ಸ್‌ ಬಿಕ್ಕಟ್ಟನ್ನು ಪರಿಹರಿಸಲು ಶ್ರಮಿಸುವುದು.

ಅಂಗೈ ಹುಣ್ಣಿಗೆ ಕನ್ನಡಿ ಬೇಕೇ?

ಭ್ರಮಾಧೀನ ಮನಸ್ಥಿತಿಯಲ್ಲಿ ಬದುಕುತ್ತಿರುವ ಸಮುದಾಯವನ್ನು ಎಚ್ಚರಿಸಿ ಮುನ್ನಡೆಸಬೇಕಾದ ಜವಾಬ್ದಾರಿ ಸಮಾಜಕ್ಕಿದೆಯಲ್ಲವೇ?

ನಿರುದ್ಯೋಗ ವ್ಯಕ್ತಿಗತ ಸಮಸ್ಯೆಯೇ?

ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಅರ್ಹತೆಯುಳ್ಳವರಷ್ಟೇ ಅಸ್ತಿತ್ವ ಉಳಿಸಿಕೊಳ್ಳಲು ಸಾಧ್ಯ ಎಂಬ ನಿಲುವು ತಳೆಯುವುದು ಆಷಾಡಭೂತಿತನವಾಗುತ್ತದೆ

ಆಟಅಂಕ

ವಿಶ್ವಕಪ್‌ ಹಾದಿಯಲ್ಲಿ...

ಏಕದಿನ ವಿಶ್ವಕಪ್‌ನಲ್ಲಿ ಭಾರತ ಎರಡು ಬಾರಿ ಪ್ರಶಸ್ತಿ ಗೆದ್ದ ಹಿರಿಮೆ ಹೊಂದಿದೆ. 2019ರಲ್ಲಿ ನಡೆಯುವ ಟೂರ್ನಿಯಲ್ಲಿ ವಿರಾಟ್‌ ಕೊಹ್ಲಿ ಬಳಗ ಟ್ರೋಫಿ ಜಯಿಸುವ ನೆಚ್ಚಿನ ತಂಡ ಎನಿಸಿದೆ. ಈ ಹಾದಿಯಲ್ಲಿ ತಂಡದ ಮುಂದಿರುವ ಸವಾಲುಗಳ ಬಗ್ಗೆ ಜಿ.ಶಿವಕುಮಾರ ಬರೆದಿದ್ದಾರೆ.

ಅಂಧರ ಚೆಸ್‌ನ ‘ಅಜೇಯ ಸಾಧಕ’

ಕರ್ನಾಟಕದ ಕಿಶನ್‌ ಗಂಗೊಳ್ಳಿ ಅಂಧೇರಿ ಕ್ರೀಡಾ ಕಾಂಪ್ಲೆಕ್ಸ್‌ನಲ್ಲಿ ನಡೆದ ಈ ಬಾರಿಯ ಚಾಂಪಿಯನ್‌ಷಿಪ್‌ನಲ್ಲೂ ‘ರಾಜ’ನಾಗಿ ಮೆರೆದರು. ಅವರು 2013ರಿಂದ 2018ರವರೆಗೆ ಐದು ಬಾರಿ ಚಾಂಪಿಯನ್‌ ಆಗಿದ್ದಾರೆ.

ಧಾರವಾಡದ ಪೈಲ್ವಾನರ ಪದಕದ ಸಾಧನೆ...

ಭಾರತ ಕ್ರೀಡಾ ಪ್ರಾಧಿಕಾರದ ಧಾರವಾಡ ಕೇಂದ್ರದಲ್ಲಿ ತರಬೇತಿ ಪಡೆಯುತ್ತಿರುವ ಕುಸ್ತಿಪಟುಗಳು ಇತ್ತೀಚಿನ ವರ್ಷಗಳಲ್ಲಿ ರಾಜ್ಯ ಮತ್ತು ರಾಷ್ಟ್ರ ಮಟ್ಟದ ಸ್ಪರ್ಧೆಗಳಲ್ಲಿ ಹೆಚ್ಚು ಪದಕಗಳನ್ನು ಗೆಲ್ಲುತ್ತಿದ್ದಾರೆ. ಇದು ಹೊಸ ಭರವಸೆಗೆ ಕಾರಣವಾಗಿದೆ. ಇದರ ಬಗ್ಗೆ ಪ್ರಮೋದ ಜಿ.ಕೆ. ಬರೆದಿದ್ದಾರೆ.

ಪಂಜಾಕುಸ್ತಿಯಲ್ಲಿ ರಾಜು ಮಿಂಚು...

‘ಮೊದಲು ನಾನು ಕುಸ್ತಿ ಸ್ಪರ್ಧೆಯಲ್ಲಿ ಭಾಗವಹಿಸುತ್ತಿದ್ದೆ. ಆಮೇಲೆ ದೇಹದಾರ್ಢ್ಯ ಸ್ಪರ್ಧೆಗಳಲ್ಲಿ ಪಾಲ್ಗೊಂಡು ಪ್ರಶಸ್ತಿ ಕೂಡ ಜಯಿಸಿದ್ದೆ. ಬಳಿಕ ಪಂಜಾಕುಸ್ತಿ ಮೇಲೆ ಆಸಕ್ತಿ ಮೂಡಿತು.

ಶಿಕ್ಷಣ

ಶಾಲಾಮಕ್ಕಳ ಮೇಲೆ ಇರಲಿ ನಿಗಾ!

ಮಕ್ಕಳು ಶಾಲೆಗೆ ಹೋಗಲು ಹಟ ಮಾಡುತ್ತಿದ್ದಾರೆ ಎಂದರೆ ಅದಕ್ಕೆ ಕಾರಣಗಳು ಹಲವು ಇರಬಹುದು. ಶಾಲೆಗೆ ಹೋಗಲು ನಿರಾಕರಿಸುವುದು ಬೇರೆ, ತರಗತಿಗಳಿಗೆ ಗೈರು ಹಾಜರಾಗುವುದು ಬೇರೆ. ಹಟ ಮಾಡುವವರಿಗೆ ಭಾವನಾತ್ಮಕ ಕಾರಣಗಳಿರಬಹುದು. ಆದರೆ ಶಾಲೆಗೇ ಹೋಗದೆ, ಅದನ್ನು ಪಾಲಕರಿಗೂ ಹೇಳದೆ ಮುಚ್ಚಿಡುವವರ ದಾರಿ ಬೇರೆಯೇ ಆಗಿರುತ್ತದೆ. ಈ ಎರಡು ಮಾನಸಿಕತೆಗಳಿಗೂ ವ್ಯತ್ಯಾಸವಿದೆ.

ಪರೀಕ್ಷೆ ಮತ್ತು ಮಕ್ಕಳ ಮನೋವಿಜ್ಞಾನ

ಭಯ ನಿವಾರಣೆಯ ಬಗ್ಗೆ ಪಾಲಕರು ಮತ್ತು ಶಿಕ್ಷಕರು ಮಕ್ಕಳಿಗೆ ನೆರವಾಗಬೇಕು. ಪರೀಕ್ಷೆ ಹತ್ತಿರವಾಗಿರುವಾಗ ಪಾಲಕರ ವರ್ತನೆ ಮಕ್ಕಳೊಂದಿಗೆ ಮತ್ತಷ್ಟು ಆತ್ಮೀಯವಾಗಿರಬೇಕು. ಮಕ್ಕಳ ಸಾಧನೆಯೇ ಪೋಷಕರ ಪ್ರೀತಿಗೆ ಕಾರಣವಾಗಿರಬಾರದು.

ಅತ್ಯುನ್ನತ ಶಿಕ್ಷಣ ಸಂಸ್ಥೆಗಳು ಎನ್ನುವ ಹೊಸ ಪ್ರಯೋಗ

ಒಂದೆರಡು ಐಐಟಿಗಳು ಮತ್ತು ಭಾರತೀಯ ವಿಜ್ಞಾನ ಸಂಸ್ಥೆಯಂತಹ ಉನ್ನತ ಶಿಕ್ಷಣ ಕೇಂದ್ರಗಳನ್ನು ಹೊರತುಪಡಿಸಿ, ಭಾರತದ ಯಾವ ಉನ್ನತ ಶಿಕ್ಷಣ ಸಂಸ್ಥೆಯೂ ಅಂತರರಾಷ್ಟ್ರೀಯ ರ‍್ಯಾಂಕಿಂಗ್‌ ಪಟ್ಟಿಗಳಲ್ಲಿ ಸ್ಥಾನ ಪಡೆದಿಲ್ಲ ಎನ್ನುವುದು ನಮ್ಮ ಶಿಕ್ಷಣ ವ್ಯವಸ್ಥೆಯ ಪ್ರತಿಫಲನವೇ ಆಗಿದೆ. ಭಾರತ ಸರ್ಕಾರವು ‘ಇನ್‌ಸ್ಟಿಟ್ಯೂಷನ್‌ ಆಫ್ ಎಮಿನೆನ್ಸ್’ ಎನ್ನುವ ಹೊಸದೊಂದು ಯೋಜನೆಯನ್ನು ರೂಪಿಸಿದೆ. ಭವಿಷ್ಯದಲ್ಲಿ ಇದು ನಮ್ಮ ದೇಶದ ಶೈಕ್ಷಣಿಕ ಗುಣಮಟ್ಟವನ್ನು ಹೆಚ್ಚಿಸೀತೆ?

ಎಂಬಿಎ ಎಚ್‌ಆರ್‌ಗೆ ಬೆಲೆ ಇದೆಯೇ?

ರಾಜ್ಯಮಟ್ಟದ ಪರೀಕ್ಷೆಗಳು ಇವೆ. ಕೆಇಎ (KEA) ಇವರು ಕರ್ನಾಟಕದಲ್ಲಿ MBA ಕಾಲೇಜುಗಳ ಪ್ರವೇಶಕ್ಕೆ PGCET ನಡೆಸುತ್ತಾರೆ. 2 ವರ್ಷಗಳ ಕೆಲಸದ ಅನುಭವ ಬೇಕು. ನಂತರ GMAT ಮತ್ತು TOEFL ಪರೀಕ್ಷೆ ಬರೆದರೆ ಅಮೆರಿಕದಲ್ಲಿ ಉನ್ನತ MBA ವ್ಯಾಸಂಗ ಸಹ ಮಾಡಬಹುದು.